Aqtóbede atasy men ájesi nemeresimen kórisip turý úshin sotqa júgindi

Foto:  istockphoto.com

Aqtóbe qalasynyń Kámeletke tolmaǵandardyń isteri jónindegi mamandandyrylǵan aýdanaralyq soty atasy men ájesiniń nemeresimen aralasý tártibin anyqtaý týraly azamattyq isti qarady, dep habarlaıdy qandastar.kz Azattyq Rýhy-na silteme jasap.

Is materıaldaryna sáıkes, balanyń ata-anasy 2020 jyly ajyrasqannan keıin ol anasymen birge turyp keledi. Atasy men ájesi nemeresimen baılanys ornatpaǵan jáne materıaldyq kómek kórsetpegen, sebebi kelinimen ara qatynastary nasharlaǵan. Degenmen, qazirgi ýaqytta olar nemeresimen qarym-qatynas ornatýǵa jáne kómektesýge nıet bildirgen.

«Qorǵanshylyq jáne qamqorshylyq organynyń sheshimi boıynsha balamen kezdesý ár jeksenbide saǵat 8:00-den 20:00-ge deıin anasynyń qatysýymen beıtarap aýmaqta uıymdastyrylýy tıis dep kórsetilgen. Alaıda talap qoıýshylar bul sheshimge kelispeı, jumadan jeksenbige deıin anasynyń qatysýynsyz kezdesý tártibin bekitýdi surady. Sot balanyń múddesin eskere otyryp, taraptardy tatýlastyrýǵa tyrysty. Nátıjesinde, atasy men ájesi nemerelerimen ár senbi kúni saǵat 11:00-den 13:00-ge deıin beıtarap aýmaqta, anasynyń qatysýymen kezdesý týraly kelisimge keldi. Sonymen qatar olar bala kámelet jasqa tolǵanǵa deıin aı saıyn 5 AEK mólsherinde alıment tóleý arqyly materıaldyq kómek kórsetýdi moıyndaryna aldy», — delingen habarlamada.

Sottyń uıǵarymy zańdy kúshine endi.