اقتوبەگە قونعان ۇشاقتا كەلىنشەك قازا تاپتى

بۇگىن ساعات 12:40-تا اقتوبە حالىقارالىق اۋەجايىنا Nordwind Airlines رەسەيلىك اۋە كومپانياسىنىڭ ەكاتەرينبۋرگ – سوچي باعىتى بويىنشا ۇشىپ كەلە جاتقان Boeing-777 ۇشاعى شۇعىل قوندى, دەپ حابارلايدى Qandastar.kz اقپاراتتىق پورتالى.

ۇشاقتىڭ جوسپاردان تىس قونۋىنا بورتتاعى جولاۋشىلاردىڭ ءبىرىنىڭ ءوزىن كەنەت ناشار سەزىنۋى سەبەپ بولعان.

«ۇشاق قونعاننان كەيىن اۋە كەمەسىنە شۇعىل ارەكەت ەتۋ قىزمەتتەرى مەن مەديتسينالىق بريگادا دەرەۋ جىبەرىلدى. وكىنىشكە وراي, قابىلدانعان بارلىق شارالارعا قاراماستان, جولاۋشىنى قۇتقارىپ قالۋ مۇمكىن بولمادى. 1983 جىلى تۋعان ايەل جولاۋشى اقتوبەگە قونعانعا دەيىن كوز جۇمدى», – دەپ حابارلادى اقتوبە اۋەجايىنىڭ ءباسپاسوز قىزمەتى.

اقتوبە حالىقارالىق اۋەجايى مارقۇمنىڭ تۋعان-تۋىستارىنا جانە جاقىندارىنا شىن جۇرەكتەن كوڭىل ايتادى.

«ءبىز اۋە كەمەسى ەكيپاجىنىڭ كاسىبي ارەكەتتەرى مەن جەردەگى قىزمەتتەرمەن ءوزارا ءىس-قيمىلىن جوعارى باعالايمىز. اتالعان وقيعا بويىنشا قۇزىرەتتى ورگاندارمەن بەلگىلەنگەن تارتىپتە جۇمىس جۇرگىزىلىپ جاتىر», – دەپ قوستى اۋەجايدىڭ ءباسپاسوز قىزمەتى.