Aqyn daýǵa qaldy: Aqberen Elgezek zańsyz paıda tapty ma?

Foto: jeke qorynan

Jelide aqyn Aqberek Elgezek pen onyń jubaıy, jýrnalıst Dına Elgezektiń tabysy qyzý talqyǵa túsip jatyr. Jasyryn telegram arnalar olarǵa zańsyz tabys tapty degen aıyp taqty, dep jazdy qandastar.kz

Orda.kz  Aqberen Elgezektiń ózine habarlasyp mán-jaıdy surastyrdy.

Bul áńgime neden shyqty?

Avtory belgisiz telegram-arnalar Elgezekterdiń zańsyz tabys tapqanyn aıtyp jazba jarııalady. Jazbada Elgezekterdiń otbasyna «Abai baspasy» JShS, «Alim Best» JShS, «Tengri Gold» JShS jáne «ULT MEDIA» QQ atty 4 kompanııa tıesili ekeni jazyldy. Jasyryn arnanyń avtory kompanııalardyń tabysy 1 mlrd teńgeden asqanyn aıtty. Aqberen Elgezek turatyn úıdi de sózine qosty.

Osydan 2 jyl buryn Abai TV telearnasyna bergen suhbatynda Aqberen Elgezek úıin kórsetken bolatyn. Áńgime osy úı týraly bolyp otyr.

Arna avtory 1 mlrd teńgeniń 610 mln teńgesi memlekettik bıýdjettiń aqshasy ekenin aıtty. Telegram-arnasynyń avtory 413 mln-y «Abaı baspasy», 186 mln – «ULT MEDIA» qoǵamdyq qory, 11,2 mln – «Tengri Gold» JShS arqyly aqynnyń qaltasyna túsken dep jazady. Jazba avtory «Abaı baspasyn» qaǵaz júzinde baspahanasy bar bolǵanymen, quraldary joq jáne basqa jaqtan shyqqan kitaptardy óz atynan shyǵaryp, memleketke qymbatqa satady dep jazdy. Sondaı-aq jazbada Aqberen Elgezekke memlekettik qyzmette bolǵan kezde tanysqan adamdaryn paıdalanyp, ákimdiktermen kelisip, memleketten tapsyrys alady degen aıyp taǵyldy. Almaty oblysy ákimdiginen 112 mln teńge, Mańǵystaý oblysy ákimdiginen 92 mln teńge, Qyzylorda oblysy ákimdiginen 81 mln teńge, Jambyl oblysy ákimdiginen 67 mln teńge alǵan dep aıyp taqty jasyryn arnanyń avtory.

Aqberen Elgezek ne deıdi?

Facebook jelisinde osy másele qyzý talqyǵa túsken soń, aqyn Aqberen Elgezek jazba jarııalap, bul jaǵdaıdyń aqparattyq shabýyl ekenin, óziniń mańdaı terimen tabys tapqanyn, zańdy buzbaǵanyn jáne kelip tekserem deýshilerge ashyq ekenin málimdedi. Elgezek jeke bıznesiniń ashyqtyǵyn kórsetip, barlyq esepshottary men qarjy málimetterin jarııalady. Aqyn kitaptarǵa qatysty aıtylǵan syndarǵa da jaýap berip, «Men satyp júrgen kitaptyń barlyǵy da «Abaı» baspasynyń óziniń tól ónimi» dep málimdedi. Ol tek zańdy túrde jumys isteıtinin aıtyp, «Satsam, mańdaı ter, adal eńbegimdi sattym» dep óz eńbeginiń nátıjesin satatynyn jetkizdi.

Orda.kz tilshisi Aqberen Elgezekke habarlasyp, jasyryn arnalarǵa qatysty surastyrdy. Aqberen Elgezek eger aıyby bolsa ashyq zań júzinde ustap, aıyp taǵatynyn, al bulaı jasyryn arna arqyly aqparat taratqandardyń naqaq jala jaýyp otyrǵanyn aıtty. Qazir jasyryn arnalar týraly zańgerlermen keńesip jatqandaryn aıtty.

«Birinshiden, biz ol anonımdi arnalardyń kimdiki ekenin bilmeımiz. Biraq qazir zańgerlermen keńesip jatyrmyz. Bulardyń artynda kim turǵanyn qudaı bilsin. Adamnyń kinási bolsa, qylmysy bolsa, ol ashyq jazylady. Buqaralyq aqparat quraldary bar, zańdy túrde, ashyq shaǵymyn aıtar edi. Adal eńbek istep, adal nanyn taýyp júrgen adamdarǵa osyndaı dúnıe uıymdastyratyndar bar. Men kim uıymdastyratynyn shynymdy aıtaıyn, bilmeımin. Bostan bos adamǵa tıispeıdi ǵoı. Biz sııaqty jumys istep júrgen 4000-ǵa jýyq baspa bar. Qanshama olıgarhtar bar… Memleketten mıllıardtap, dollarlap qarjy alyp jatqan. Olar týraly eshteńe aıtpaıdy. Men shotymnyń bárin ashyq kórsetip qoıdym. Bir kompanııamda 4 mıllıon teńge tur. Onyń ózi jaýyp tastamasyn dep saqtap otyrǵan aqsham. Ony sóz qylyp aıtýdyń qanshalyqty qajeti bar? Munyń artynda basqa bir nárse tur», — dedi Aqberen Elgezek.

Sonymen qatar ol áldekimderdiń ishtarlyqpen aıaqtap shalyp otyrýy múmkin ekenin aıtty. Aqynnyń sózinshe onyń jańadan túsirip jatqan fılmine jurt barmaýy úshin jek kórinishti qylyp kórsetýge tyrysyp jatyr.

«Bireýler qyzǵanýy múmkin. Kınosy shyǵaıyn dep jatyr, eldiń aldynda jek kórinishti qylaıyq, kınosyna barmasyn dep. Jaý alystan kelmeıdi. Kınonyń bári qarjyǵa shyǵyp jatqanyn, qanshama kompanııaǵa qaryzbyz, prokattan keıin eseptesemiz dep otyrmyz. Bul qudaıdyń marketıngi boldy. Adal adamǵa qııanat jasaımyn degen kezde, qudaı ony qorǵaıdy. Menen qoryqpasyn, adamnan qoryqpasyn, Alladan qoryqsyn. Ol adam osy dúnıede jaýap beredi. O dúnıe bólek áńgime. Bala-shaǵasyn, ózin oılaýy kerek qoı. Men eshteńe istemedim, eldiń aldynda ashyq júrmin», – dedi Aqberen Elgezek.

Aqberen Elgezek – 1980 jyly Almaty qalasynda dúnıege kelgen. Qalamgerdiń «Kóleńkeler kúbiri», «Ǵarshy», «Sheksizdik syrtyndaǵy sham», «Fantasmagoria» (túrik tilinde) atty jyr jınaqtary men «Bolmaǵan balalyq shaq» atty povesi jaryq kórgen.

Aqyn 2001 – 2003 jyldary Almaty qalalyq Ishki saıasat departamentiniń bas mamany boldy. 2003 – 2004 jyldary – QR Ulttyq ınjenerlik akademııasy Prezıdentiniń keńesshisi boldy. Birqatar qyzmetterde bolǵan aqyn 2012 jyly QR Bilim jáne ǵylym mınıstrligi «Aqparattyq-taldaý ortalyǵy» AQ-nyń vıe-prezıdenti, 2012-2015 jyldary Ult portaly basylymynyń bas redaktory qyzmetin atqardy. Al 2015-2016 jyldary Ońtústik Qazaqstan oblysy ákimi apparat basshysynyń orynbasary, 2016-2017 jyldary Qazaqstan Respýblıkasy Qorǵanys jáne aeroǵarysh ónerkásibi mınıstriniń keńesshisi-baspasóz xatshysy bolǵan. Al 2018 jyldan 2023 jylǵa deıin Qazaqstan Jazýshylar odaǵy basqarma tóraǵasynyń birinshi orynbasary boldy. Qazir «Abaı» baspasynyń dırektory.

Aqyn memlekettik «Daryn» jastar syılyǵynyń, Qazaqstan Jastar odaǵynyń «Serper» jáne «Altyn qalam» ulttyq syılyqtarynyń laýreaty. «Semser» ulttyq ádebı baıqaýynyń Gran-Prı ıegeri. Halyqaralyq Mahmud Qashqarı syılyǵynyń laýreaty. Kóptegen respýblıkalyq músháıralardyń júldegeri.

Aqberen Elgezektiń jubaıy Dına Elgezek – jýrnalıst, qoǵam belsendisi, til máselesin kóterip, el arasynda halyqtyń sózin sóılep, bılikti synap júrgen adamdardyń biri.

1974 jyly Aralda dúnıege kelgen. «Habar» telearnasynda jumys istegen. 2012-2014 jyldary Qazaqstan ulttyq telearnasynda qyzmet atqarǵan. Qazirgi kezde  Ult.kz ınternet basylymyna maqalalar jarııalaıdy. Ult.kz basylymy Aqberen Elgezektiń «Tengri Gold» JShS-ne tıesili. Dına Elgezek kóp suhbattarynda bılikti synǵa alyp júrgen jýrnalıst. Mysaly ARA MEDIA youtube arnasyna bergen suhbatynda Dına Elgezek Qasym Jomart Toqaevtyń eskertýsiz oq atýy jaıly buıryǵyn synǵa alyp, ashyq pikir bildirdi.