«Alalaǵandaı boldyq»: Belgili zańger Olımpıadadan kúmis alǵan Narımanǵa eshteńe bermegen halyqqa renjidi

Foto: ashyq derekkóz

Qazaqstandyq zańger Lázzat Ahatova Parıj Olımpıdasynan kúmis medal ákelgen gımnast jigit Narıman Qurbanovtyń syılyqsyz qalǵanyna renjidi. Bul týraly Lázzat Ahatova áleýmettik jelisindegi paraqshada málimdedi, dep habarlaıdy Skifnews.kz aqparat portaly.

«Medal almaǵandarǵa da kólik syılap jatqan jomart qazaq, qolany altynǵa bergisiz etip, qarsy alyp jatqan qazaq, tipti 9-oryn alyp kelgen sportshyǵa Astanadan páter berip jatqan qazaq, bir Narımanǵa kelgende, tarylǵandary qynjyltty», dep jazdy Lázzat Ahatova.

Onyń aıtýynsha, sportshy elimizge kúmis syılap, gımnastıkadan tarıhı jetistikke jetti.

«Sol jetistik taqııamyzǵa tar kep tur ma? Aınaldyrǵan 7 medal, ózi. Ultyna qarap, alalaǵandaı boldyq qoı, uıat boldy..Atymyzǵa, eldigimizge syn boldy. Qazaqqa kúıeý bala bolady eken, legıoner emes, ózimizdiń bala ǵoı. Týymyzdy arqasyna jamylyp, máz bop júrdi, olımpıada tórinde. Bizdiń qazaqta jomart azamattar az emes, áli de basqalarǵa kórsetken syı-qurmetti jasaýǵa kesh emes. Uıat bolmasyn, aǵaıyn», – dedi zańger.