العاش رەت باتىر اناعا جاردەماقى سمس حابارلاما ارقىلى تاعايىندالدى

كوپبالالى «التىن القا», «كۇمىس القا» يەلەنگەن انالارعا ءتيىستى جاردەماقى پرواكتيۆ تاسىلىمەن تاعايىندالاتىن بولدى. «ازاماتتارعا ارنالعان ۇكىمەت» جاڭا پيلوتتىق جوبا اياسىندا 6-7 بالاسى بار ايەلدەرگە ەش قۇجاتسىز-اق كەرەكتى تولەمدەردى اۋداراتىن بولادى.
ەڭ العاشقىلاردىڭ ءبىرى بولىپ, ۋميدا احۋنجانوۆا «كۇمىس القا» يەلەنۋىنە بايلانىستى ءتيىستى جاردەماقىنىڭ تاعايىندالعانى تۋرالى سمس حابارلاما الدى. تاراز قالاسىندا تۇراتىن التى بالانىڭ اناسى كەلگەن سمس حابارلامالارعا وڭ جاۋاپ بەرىپ, ءبىرشاما ۋاقىتىن ۇنەمدەگەنىن ايتادى.

«مۇنداي دۇنيەنىڭ ىسكە قوسىلعانىنا تاڭمىن. بۇل بولماعاندا, كىشكەنتاي بالالارىمدى تاستاپ, قۇجاتتاردى وتكىزىپ جۇرەتىن ەدىم. بۇل مەنىڭ قانشاما التىن ۋاقىتىمدى ۇنەمدەدى. سەبەبى, مەن ءۇشىن بوبەكتەرىممەن وتكىزگەن ءار ساعاتىم قىمبات», – دەدى ەڭ العاشقى پرواكتيۆ تاسىلىمەن جاردەماقى العان كوپبالالى انا ۋميدا احۋنجانوۆا.

جوبا اياسىندا ۋميدانىڭ تەلەفونىنا ەڭ الدىمەن جاردەماقى الۋعا قۇقىلىسىز دەگەن حابارلاما كەلگەن, كەيىن جاردەماقى اۋدارىلۋى ءتيىس ەسەپ-شوتتىڭ ءنومىرى جولدانعان. ولاردىڭ دۇرىستىعىنا كەلىسىمىن بەرگەن باتىر اناعا ەڭ سوڭىندا جاردەماقىنىڭ تاعايىندالعانى تۋرالى سمس كەلگەن. ايتا كەتەيىك, قىزمەتتى الۋ ءۇشىن ۇيالى تەلەفون ءنومىرى ءموبيلدى ازاماتتار بازاسىندا تىركەلۋى ءتيىس.

كوپبالالى انالار ناگرادانى الۋ ءۇشىن جەرگىلىكتى اكىمدىككە ءوتىنىش جازىپ, كەيىن ونىڭ تاعايىندالعانى تۋرالى قۇجاتتى حالىققا قىزمەت كورسەتۋ ورتالىعىنا وتكىزەتىن. بۇدان بۇلاي حقو-عا بارۋدىڭ قاجەتى بولمايدى, قىزمەت اۆتوماتتى تۇردە كورسەتىلەتىن بولادى.

«پرواكتيۆ – قازاقستاندىقتاردىڭ قۇجاتتاردى ەشقايدا وتكىزبەي-اق, مەملەكەتتىك قىزمەتتەردى الۋىنا مۇمكىندىك بەرەتىن جوبا. بۇگىندە جاس انالارىمىز پرواكتيۆ اياسىندا كەلەتىن سمس-تەرگە جاۋاپ بەرىپ, بالانىڭ تۋ كۋالىگىن جاساتىپ, ونىڭ كۇتىمىنە بايلانىستى جاردەماقىنى راسىمدەپ, بالاباقشا كەزەگىنە تۇرىپ, ءسابيدى مەكەنجاي تىركەۋىنە قويا الادى. سونداي-اق وسى پرواكتيۆتى تۇردە زەينەتكەرلىككە شىعۋ, مۇگەدەكتىكتى راسىمدەۋ قىزمەتتەرى الداعى ۋاقىتتا ىسكە قوسىلادى. ءبىز ازاماتتارىمىزدىڭ ءومىرىن جەڭىلدەتىپ, ارتىق قاعازباستىلىقتان ارىلتامىز. بۇل – مەملەكەتتىك قىزمەتتەردى تسيفرلى فورماتقا اۋىستىرۋداعى بىرقاتار باستامامىزدىڭ ءبىرى», – دەدى مەملەكەتتىك كورپوراتسيانىڭ باسقارما ءتورايىمى اسەمگۇل بالتاشەۆا.

BAQ.KZ