اليمەنت: بورىشكەردىڭ بەرەشەگى ₸63 ملن جەتتى

الماتىدا اليمەنت تولەۋدەن جالتارعان ءبىر عانا ازاماتتىڭ بەرەشەگى 63 ميلليون تەڭگەگە جەتكەن, دەپ حابارلايدى 24KZ. قازىر قالادا بالانىڭ الدىنداعى مىندەتىن وتەۋدەن بوي تاسالاپ جۇرگەندەر بويىنشا 22 مىڭ ءىس قارالىپ جاتىر. بۇل تۋرالى بۇگىن وتكەن بريفينگتە ايتىلدى.

بورىشكەرلەردىڭ 10%-ءى تۇراقتى جۇمىسىنىڭ جوقتىعىن العا تارتادى. ونداي جاعدايدا جۇمىسقا ورنالاستىرۋعا دا قول ۇشىن سوزامىز, – دەيدى ماماندار. الايدا اجەپتەۋىر تابىس تاۋىپ جۇرسە دە, اليمەنت تولەمەيتىندەر بار. جەكە سوت ورىنداۋشىلار جاقىندا وسىنداي 200-دەن اسا ازاماتتى انىقتادى.

ادىلەت مينيسترلىگىمەن بىرلەسكەن اۆتوماتتى جۇيە بورىشكەرلەر تۋرالى بارلىق اقپاراتتى الۋعا مۇمكىندىك بەرىپ وتىر.

ايدىن قايداروۆ, قالالىق جەكە سوت ورىنداۋشىلارى وڭىرلىك پالاتاسىنىڭ باسشىسى: — بۇرىن بورىشكەرلەردى اكىمشىلىك جاۋاپقا تارتقان كەزدە تەك قانا ايىپپۇل سالىناتىن, قازىرگى ۋاقىتتا قاماۋعا الۋ ماسەلەلەرى قولعا الىنىپ جاتىر.

بىلتىرعى جىلى 280-نەن استام بورىشكەردى اكىمشىلىك جاۋاپقا تارتتىق باپ بويىنشا. سونىڭ كوبى قاماۋعا الىندى اكىمشىلىك سوتپەن. قازىرگى ۋاقىتتا قىلمىستىق جاۋاپكەرشىلىككە تارتۋ باعىتىندا كوپتەگەن جۇمىستاردى الماتى قالاسىنىڭ پروكۋراتۋراسىمەن بىرلەسىپ اتقارىپ جاتىرمىز. قازىر بەرەشەگى 3 ايدان اسقان 1000 پروبلەمالىق ءىس بويىنشا جۇمىس جۇرگىزىلىپ جاتىر.

سوت ورىنداۋشىلار بورىشكەرلەردىڭ ەسەپشوتتارىن بۇعاتتاپ, مۇلكىنە تىيىم سالا الادى. اتاپ ايتقاندا, ولاردىڭ اۆتوكولىكتەرىن ايىپ تۇراعىنا قويىپ, ارى قاراي اۋكتسيوندار ارقىلى ساتۋعا رۇقسات ەتىلگەن. اليمەنت ءوندىرۋ ماسەلەسى مەدياتيۆتىك كەلىسىم شەڭبەرىندە دە شەشىلىپ جاتادى, – دەيدى ماماندار. ماسەلەن, ءبىر بورىشكەر 3 بولمەلى پاتەردى اليمەنت بويىنشا ءىرى بەرەشەكتى وتەۋ ءۇشىن بەرگەن. ءانۋار جەكسەكوۆ, قالالىق ادىلەت دەپارتامەنتى سوت ورىنداۋشىلارىنىڭ قىزمەتىن رەتتەۋ جانە باقىلاۋ ءبولىمىنىڭ باسشىسى: — ادىلەت دەپارتامەنتى جەكە سوت ورىنداۋشىلار پالاتاسىمەن بىرلەسە وتىرىپ, اليمەنت ءوندىرۋ بويىنشا تىعىز ىنتىماقتاستىقتا جۇمىس ىستەپ جاتىر. بيىل اليمەنت وندىرۋگە قاتىستى 10 بورىشكەردىڭ اۆتوكولىگى باعالاۋ جانە قارىزدارىن وتەۋ ماقساتىندا ساتۋ ءۇشىن الىندى.