ALIMENT: BORYShKERDIŃ BEREShEGI ₸63 MLN JETTI

Almatyda alıment tóleýden jaltarǵan bir ǵana azamattyń bereshegi 63 mıllıon teńgege jetken, dep habarlaıdy 24KZ. Qazir qalada balanyń aldyndaǵy mindetin óteýden boı tasalap júrgender boıynsha 22 myń is qaralyp jatyr. Bul týraly búgin ótken brıfıngte aıtyldy.

Boryshkerlerdiń 10%-i turaqty jumysynyń joqtyǵyn alǵa tartady. Ondaı jaǵdaıda jumysqa ornalastyrýǵa da qol ushyn sozamyz, – deıdi mamandar. Alaıda ájepteýir tabys taýyp júrse de, alıment tólemeıtinder bar. Jeke sot oryndaýshylar jaqynda osyndaı 200-den asa azamatty anyqtady.

Ádilet mınıstrligimen birlesken avtomatty júıe boryshkerler týraly barlyq aqparatty alýǵa múmkindik berip otyr.

Aıdyn Qaıdarov, qalalyq jeke sot oryndaýshylary óńirlik palatasynyń basshysy: — Buryn boryshkerlerdi ákimshilik jaýapqa tartqan kezde tek qana aıyppul salynatyn, qazirgi ýaqytta qamaýǵa alý máseleleri qolǵa alynyp jatyr.

Byltyrǵy jyly 280-nen astam boryshkerdi ákimshilik jaýapqa tarttyq bap boıynsha. Sonyń kóbi qamaýǵa alyndy ákimshilik sotpen. Qazirgi ýaqytta qylmystyq jaýapkershilikke tartý baǵytynda kóptegen jumystardy Almaty qalasynyń prokýratýrasymen birlesip atqaryp jatyrmyz. Qazir bereshegi 3 aıdan asqan 1000 problemalyq is boıynsha jumys júrgizilip jatyr.

Sot oryndaýshylar boryshkerlerdiń esepshottaryn buǵattap, múlkine tyıym sala alady. Atap aıtqanda, olardyń avtokólikterin aıyp turaǵyna qoıyp, ary qaraı aýkıondar arqyly satýǵa ruqsat etilgen. Alıment óndirý máselesi medıatıvtik kelisim sheńberinde de sheshilip jatady, – deıdi mamandar. Máselen, bir boryshker 3 bólmeli páterdi alıment boıynsha iri bereshekti óteý úshin bergen. Ánýar Jeksekov, qalalyq Ádilet departamenti sot oryndaýshylarynyń qyzmetin retteý jáne baqylaý bóliminiń basshysy: — Ádilet departamenti jeke sot oryndaýshylar palatasymen birlese otyryp, alıment óndirý boıynsha tyǵyz yntymaqtastyqta jumys istep jatyr. Bıyl alıment óndirýge qatysty 10 boryshkerdiń avtokóligi baǵalaý jáne qaryzdaryn óteý maqsatynda satý úshin alyndy.