جاڭالىقتار
الماتى ماڭىندا جەر سىلكىنىسى كەزىندە باس ساۋعالايتىن شاتىرلى لاگەر سالىنادى
فوتو: pexels.com
ءماجىلىس وتىرىسىندا توتەنشە جاعداي ءمينيسترى شىڭعىس ءارىنوۆ الماتى ماڭىندا جەر سىلكىنىسى كەزىندە ادامدار پانالايتىن شاتىرلى لاگەر قۇرۋ تۋرالى جوسپارىن ايتتى. بۇل تۋرالى qandastar.kz Stan.kz اقپارات اگەنتتىگىنە سىلتەمە جاساپ حابارلايدى.
شىڭعىس ءارىنوۆ مينيسترلىكتىڭ جەدەل ماقساتتاعى “الاتاۋ”وڭتۇستىك بازاسىنىڭ قۇرىلعانىن ايتتى.
“جويقىن جەر سىلكىنىسى بولعان جاعدايدا الماتى ماڭىندا زارداپ شەككەندەر ءۇشىن شاتىرلى لاگەر قۇرىلادى. سونداي-اق گۋمانيتارلىق كومەكتى قابىلداۋ پۋنكتەرى مەن باسقا دا قاجەت قوسالقى نىساندار بولادى”, – دەيدى مينيسترلىك باسشىسى.
مينيستر لاگەردىڭ باستى ارتىقشىلىعى 173 گەكتار اشىق جەر دەيدى.
“بۇل جەر وپىرىرىلمايدى جانە ول جارىقتارى جوق ۇستىرتتە ورنالاسقان. وندا كىرەتىن جولدار بار جانە جاقىن جەردە تەمىر جول ورنالاسقان. ءبىز سوندا ترەنينگ وتكىزەمىز. ول جاقتا شاتىرلار جەتكىلىكتى. وعان قوسا, مەملەكەتتىك ماتەريالدىق رەزەرۆ جۇيەسىنىڭ نومەنكلاتۋراسىندا ءبىز مىندەتتى تۇردە شاتىرلار, توسەك-ورىندار, ارقاعا اساتىن سومكەلەر بەرەمىز. مۇنىڭ ءبارى قانداي دا ءبىر دەربەستىك بولۋى ءۇشىن كەرەك. تاعى ءبىر شەشىلمەگەن ماسەلە بار. ءبىز ار زارداپ شەققان ادامعا تەرميكالىق ىشكيىم مەن جىلى كيىم جانە بارلىق قورعانىس قۇرالدارىنىڭ بەرىلۋىن قامتاماسىز ەتۋگە كوشەمىز. ءار 10 ادامدا مەديتسينالىق قوبديشا بولادى. سونداي-اق العاشقى مەديتسينالىق كومەك كورسەتە الاتىن دارىگەرلەر دە بولادى دەپ ۇمىتتەنەمىز. سونىمەن قاتار وندا شاتىرلار, ۇيىقتاۋعا ارنالعان قاپتار, قۇرال-جابدىقتار جانە ءۇش كۇنگە جەتەتىن ازىق-ت ۇلىك بولادى”, – دەيدى شىڭعىس ءارىنوۆ.
مينيستر ادامدار جيى-ءجيى ورنالاسسا, بازادا 50 مىڭ ادام سىياتىن ورىن بارىن ايتادى.
“ادامداردىڭ سىيىمدىلىعىن 1 ميلليون ورىنعا جەتكىزسەك دەيمىز. تەك الماتى ماڭىندا عانا ەمەس, باسقا قالالاردىڭ جانىنان دا وسىنداي قاۋىپسىز جەر ىزدەپ جاتىرمىز”, – دەدى ۆەدومستۆو باسشىسى.
ەسكە سالايىق, بۇعان دەيىن 23 قاڭتاردا الماتىدا جەر سىلكىنىسى بولدى. استانا ۋاقىتىمەن 00 ساعات 09 مين 02 سەكۋندتا الماتىلىقتار قاتتى جەر سىلكىنىسىن سەزدى. توتەنشە جاعدايلار دەپارتامەنتىنىڭ مالىمەتىنشە, جەر استى ءدۇمپۋىنىڭ ەپيتسەنترى الماتىنىڭ وڭتۇستىك-شىعىسىندا, 264 شاقىرىم جەردە تىركەلدى. ماگنيتۋداسى – 6,7 بالل. بۇدان سوڭ تۇرعىندار قالادا تاعى دا بىرنەشە جەر سىلكىنىسى سەزىلگەنىن حابارلادى. ال تجد دەرەگىنە سايكەس الداعى ۋاقىتتا قۋاتتى جەر سىلكىنىسى بولمايدى, سوندىقتان دۇرلىگۋدىڭ قاجەتى جوق.
