جاڭالىقتار
الماتى پوليتسياسى ءۇش ادامدى قاساقانا قاققان كولىكتەردى تاركىلەدى
الماتىدا ءۇش ادامدى قاساقانا قاققان كولىكتەردىڭ ەكەۋى دەتابىلىپ, ارنايى اۆتوتۇراققا جەتكىزىلدى, دەپ حابارلايدى قازاقپارات ءتىلشىسى الماتى قالالىق پوليتسيا دەپارتامەنتىنىڭ باسپاسوز قىزمەتىنە سىلتەمە جاساپ.
تەرگەۋ باسقارماسىنىڭ مالىمەتىنشە, اق ءتۇستى «Toyota Camry» جانە قارا ءتۇستى «Toyota Avensis» كولىكتەرى ايعاقزاتتار رەتىندە الىنىپ, قر قك-ءنىڭ 24-بابى 3-بولىگى جانە 99-بابىنىڭ 2-بولىگى بويىنشا قوزعالعان قىلمىستىق ءىس ماتەريالدارىنا تىركەلدى.
«ەكى كولىكتى دە كريميناليستىك زەرتحانا قاراپ شىقتى, ولاردا سوقتىعىسۋ بەلگىلەرى بار. ءتيىستى ساراپتاما تاعايىندالدى. قازىر ماشينالار مامانداندىرىلعان اۆتوتۇراققا قويىلىپ, قىلمىس قۇرالى رەتىندە ولارعا ارەست قويۋ تۋرالى تەرگەۋشىنىڭ قاۋلىسى شىقتى», – دەدى الماتى قالالىق پد تەرگەۋ باسقارماسى باستىعىنىڭ ورىنباسارى دۋمان اۋحاديەۆ.
الماتىنىڭ گاگارين كوشەسىندە ادامداردى قاساقانا قاققان كۇدىكتىلەردىڭ ءبىرى 26 تامىز كۇنى كەشكە ۇستالعان بولاتىن. 1995 جىلى تۋعان ازامات ا. الماتى وبلىسى ەڭبەكشىقازاق اۋدانىنىڭ تۇرعىنى. ول قر قىلمىستىق كودەكسىنىڭ 128-بابى تارتىبىندە ۋاقىتشا ۇستاۋ يزولياتورىنا قامالدى. ەر ادام قىلمىس جاساۋ كەزىندە اق ءتۇستى «Toyota Camry» ماركالى اۆتوكولىگىن باسقارعان.
«ەكىنشى كۇدىكتىنىڭ جەكە باسى انىقتالدى. جاقىن ارادا مىندەتتى تۇردە ۇستالادى. ول وتىرعان «Toyota Avensis» كولىگىن تاۋىپ, تاركىلەدىك. ايتا كەتۋ كەرەك, قىلمىستىق ءىستىڭ ماتەريالدارى اۋداندىق پوليتسيا باسقارماسىنان تەرگەۋ باسقارماسىنىڭ وندىرىسىنە بەرىلدى. بۇل قىلمىستى تەرگەۋ ءۇشىن ارنايى جەدەل-تەرگەۋ توبى قۇرىلدى», – دەدى پودپولكوۆنيك اۋحاديەۆ.
ەستەرىڭىزگە سالايىق, 26 تامىزدا تاڭعى ساعات 5-تە الماتى قالاسىنىڭ گاگارين كوشەسىندە ارادا بولعان جانجالدان كەيىن ءبىر تاراپتىڭ وكىلدەرى ءوز قارسىلاستارىن اۆتوموبيلمەن قاساقانا قاعىپ, قىلمىس ورنىنان بوي تاسالاعان. ۆيدەو الەۋمەتتىك جەلىدە تارادى.
زارداپ شەككەندەردىڭ دەنساۋلىعى تۋرالى الماتى قالالىق دەنساۋلىق ساقتاۋ باسقارماسى ءمالىم ەتتى.
«الماتى №7 قالالىق كلينيكالىق اۋرۋحاناعا 2 ادام تۇستى. بىرىنشىسىنە اشىق باس سۇيەك-مي جاراقاتى, ميدىڭ جەڭىل دارەجەدەگى جاراقاتى, باستىڭ وڭ جاق سۇيەگىنىڭ سىنۋ دياگنوزى قويىلدى. جاعدايى – ورتاشا اۋىر. ەكىنشى ناۋقاسقا جابىق باس جاراقاتى, ميدىڭ شايقالۋ دياگنوزى قويىلدى. جاعدايى ورتاشا اۋىر دەپ باعالانادى. ءۇشىنشىسى ورتالىق قالالىق اۋرۋحاناعا جەتكىزىلدى. ونىڭ سول اياعىنىڭ توبىعى, وڭ قول شىنتاعى جابىق, سول قول شىنتاعىنا اشىق سىنعان دەگەن دياگنوز قويىلىپ وتىر. جاعدايى ورتاشا اۋىر», – دەپ حابارلادى دەنساۋلىق ساقتاۋ باسقارماسىنان.
