الماتىدا 9-قاباتتان سەكىرىپ مەرت بولعان وقۋشى الدەكىمگە حابارلاما جىبەرگەن

فوتو: Tengrinews.kz/ ءاليحان ساريەۆ

الماتىدا كوپقاباتتى تۇرعىن ءۇيدىڭ شاتىرىنان قۇلاپ مەرت بولعان ەكى قىزدىڭ ءبىرىنىڭ ۇيالى تەلەفونىنان كۋاگەرلەر جازبا تاپتى. 16 قىركۇيەكتە تاڭعى 10 شاماسىندا المالى اۋدانىندا ەكى وقۋشىنىڭ دەنەسى تابىلدى, – دەپ حابارلايدى qandastar.kz Almaty.tv تەلەارناسىنا سىلتەمە جاساپ.

جاعا ۇستاتارلىق جايت جامبىل كوشەسى مەن سەيفۋللين داڭعىلىنىڭ قيىلىسىنداعى 9 قاباتتى باسپانادا بولدى. ۇيىنە قايتىپ كەلە جاتقان گالينا ۆاسيلەۆا اۋلاسىنىڭ ماڭىنان پوليتسيا قىزمەتكەرلەرىن كورىپ, جاقىنداي بەرگەندە جەردەن وقۋشى قىزداردىڭ ءمايىتىن كورىپ ەسەڭگىرەپ قالعان.

«مەن ەمحانادا بولعام. كەلسەم, پوليتسەيلەر ءجۇر. ەكى قىزدىڭ دەنەسىن كوردىم. ولاردىڭ بيىكتەن قۇلاپ, وزدەرىنە قول جۇمساعانىن ەستىدىم. مەنىڭ بىلۋىمشە, ولار الدىمەن تامىرىن كەسپەك بولعان. الايدا قولدارىنان كەلمەگەن سوڭ, سەكىرگەن سەكىلدى. سومكەلەرى تولعان قورقىنىشتى زاتتار, سۇمدىق-اي! مىنا شاتىرعا باراتىن باسپالداق ۇنەمى اشىق تۇرادى», – دەدى كۋاگەر گالينا ۆاسيلەۆا

تۇرعىندار قايعىلى جاعدايدان كەيىن پوليتسەيلەرمەن بىرگە ءجۇرىپ, ءۇي كىرەبەرىسىندە تەمەكى قالدىقتارىن بايقاعان. ودان سوڭ شاتىرعا شىعىپ, وقۋشى قىزداردىڭ سومكەلەرى مەن جەكە زاتتارىن كورىپ شوشىعان. سەبەبى دوربالاردىڭ ىشىندە قانعا ورانعان مايلىق, دارىلىك پرەپاراتتار مەن قاۋىپتى وتكىر زاتتار بولعان. سونداي-اق وقۋشىنىڭ ءبىرى ۇيالى تەلەفونىنان بەيتانىس ادامعا كۇماندى حابارلاما جىبەرگەن.

«قىزداردىڭ ءبىرىنىڭ سومكەسى جاتتى. ونىڭ ىشىندە اس ءۇي پىشاعى, كەسكىش زاتتار, قانعا بويالعان مايلىق, 7-سىنىپتىڭ وقۋلىقتارى بولدى. ءبىز جوعارى كوتەرىلدىك. وندا ەكى اياق كيىم, ەكى تەلەفون بولدى. سوسىن شىلىمنىڭ قالدىعىن كوردىك. تەلەفوندارىن كۋاگەر رەتىندە ءبىزدىڭ كوزىمىزشە اشىپ كورسەتتى, وندا الدەكىمگە «تامىرىمدى تاپپاي تۇرمىن, شارشادىم, ەشكىمگە كەدەرگى, ماسىل بولعىم كەلمەيدى» دەگەن حابارلاما جىبەرىلگەن», – دەدى كۋاگەر ناتاليا ناۋموۆا.

كۋاگەرلەردىڭ سوزىنشە, مارقۇم قىزدار جاقىن دوس بولعان كورىنەدى. ولار سول ماڭايداعى №25 مەكتەپتىڭ 7-سىنىبىندا وقىعان. ءبىرى –كورشى اۋلادا, ەكىنشىسى – سول اۋدانداعى باسقا كوپقاباتتى ۇيدە تۇرعان. وقيعاعا قاتىستى پوليتسيا دەپارتامەنتى مالىمدەمە جاسادى.

«بۇل دەرەك بويىنشا المالى اۋداندىق پوليتسيا باسقارماسى قىلمىستىق ءىس قوزعادى. وقيعانىڭ سەبەبى مەن ءمان-جايى انىقتالىپ جاتىر», – دەدى الماتى قالالىق پوليتسيا دەپارتامەنتىنىڭ رەسمي وكىلى سالتانات ازىربەك.

جانتۇرشىگەرلىك جاعداي بۇل كوپقاباتتى ءۇيدىڭ تۇرعىندارىن ەسەڭگىرەتىپ تاستادى. ونىڭ ۇستىنە, جوعارىعا اپاراتىن ەسىكتىڭ ءاردايىم اشىق تۇراتىنىن ءبارى بىلەدى. «جاسوسپىرىمدەر ءتۇرلى ارەكەتكە بارۋى مۇمكىن» دەپ الاڭدايدى. بۇگىنگى قايعىلى وقيعا بۇعان دالەل بولعانداي. تۇرعىندار پاتەر يەلەرى كووپەراتيۆتەرىنەن اۋلاداعى قاۋىپسىزدىكتى قاتاڭ باقىلاۋعا الۋدى تالاپ ەتىپ وتىر.