Almatyda 9-qabattan sekirip mert bolǵan oqýshy áldekimge habarlama jibergen

Foto: Tengrinews.kz/ Álıhan Sárıev

Almatyda kópqabatty turǵyn úıdiń shatyrynan qulap mert bolǵan eki qyzdyń biriniń uıaly telefonynan kýágerler jazba tapty. 16 qyrkúıekte tańǵy 10 shamasynda Almaly aýdanynda eki oqýshynyń denesi tabyldy, – dep habarlaıdy qandastar.kz Almaty.tv telearnasyna silteme jasap.

Jaǵa ustatarlyq jaıt Jambyl kóshesi men Seıfýllın dańǵylynyń qıylysyndaǵy 9 qabatty baspanada boldy. Úıine qaıtyp kele jatqan Galına Vasıleva aýlasynyń mańynan polıııa qyzmetkerlerin kórip, jaqyndaı bergende jerden oqýshy qyzdardyń máıitin kórip eseńgirep qalǵan.

«Men emhanada bolǵam. Kelsem, polıeıler júr. Eki qyzdyń denesin kórdim. Olardyń bıikten qulap, ózderine qol jumsaǵanyn estidim. Meniń bilýimshe, olar aldymen tamyryn kespek bolǵan. Alaıda qoldarynan kelmegen soń, sekirgen sekildi. Sómkeleri tolǵan qorqynyshty zattar, sumdyq-aı! Myna shatyrǵa baratyn baspaldaq únemi ashyq turady», – dedi kýáger Galına Vasıleva

Turǵyndar qaıǵyly jaǵdaıdan keıin polıeılermen birge júrip, úı kireberisinde temeki qaldyqtaryn baıqaǵan. Odan soń shatyrǵa shyǵyp, oqýshy qyzdardyń sómkeleri men jeke zattaryn kórip shoshyǵan. Sebebi dorbalardyń ishinde qanǵa oranǵan maılyq, dárilik preparattar men qaýipti ótkir zattar bolǵan. Sondaı-aq oqýshynyń biri uıaly telefonynan beıtanys adamǵa kúmándi habarlama jibergen.

«Qyzdardyń biriniń sómkesi jatty. Onyń ishinde as úı pyshaǵy, keskish zattar, qanǵa boıalǵan maılyq, 7-synyptyń oqýlyqtary boldy. Biz joǵary kóterildik. Onda eki aıaq kıim, eki telefon boldy. Sosyn shylymnyń qaldyǵyn kórdik. Telefondaryn kýáger retinde bizdiń kózimizshe ashyp kórsetti, onda áldekimge «tamyrymdy tappaı turmyn, sharshadym, eshkimge kedergi, masyl bolǵym kelmeıdi» degen habarlama jiberilgen», – dedi kýáger Natalıa Naýmova.

Kýágerlerdiń sózinshe, marqum qyzdar jaqyn dos bolǵan kórinedi. Olar sol mańaıdaǵy №25 mekteptiń 7-synybynda oqyǵan. Biri –kórshi aýlada, ekinshisi – sol aýdandaǵy basqa kópqabatty úıde turǵan. Oqıǵaǵa qatysty polıııa departamenti málimdeme jasady.

«Bul derek boıynsha Almaly aýdandyq polıııa basqarmasy qylmystyq is qozǵady. Oqıǵanyń sebebi men mán-jaıy anyqtalyp jatyr», – dedi Almaty qalalyq Polıııa departamentiniń resmı ókili Saltanat Ázirbek.

Jantúrshigerlik jaǵdaı bul kópqabatty úıdiń turǵyndaryn eseńgiretip tastady. Onyń ústine, joǵaryǵa aparatyn esiktiń árdaıym ashyq turatynyn bári biledi. «Jasóspirimder túrli áreketke barýy múmkin» dep alańdaıdy. Búgingi qaıǵyly oqıǵa buǵan dálel bolǵandaı. Turǵyndar páter ıeleri kooperatıvterinen aýladaǵy qaýipsizdikti qatań baqylaýǵa alýdy talap etip otyr.