جاڭالىقتار
الماتىدا تانىسۋ سايتتارى ارقىلى ادامداردى الداپ, توناعاندار ۇستالدى
فوتو: polisia.kz
الماتىدا تانىسۋ سايتتارى ارقىلى ەر ادامداردى الداپ, توناپ كەلگەن كۇدىكتىلەر توبى ۇستالدى, – دەپ حابارلايدى qandastar.kz Polisia.kz-كە سىلتەمە جاساپ.
قاسكويلەردىڭ ارەكەت ەتۋ سحەماسى قاراپايىم, بىراق ولار ءۇشىن وتە ءتيىمدى بولعان: قىزدار تانىسۋ سايتتارىندا ەر ادامداردىڭ نازارىن اۋدارىپ, ولاردى جەكە كەزدەسۋگە شاقىرعان. كەزدەسۋ بارىسىندا سىبايلاستارى كەنەتتەن شابۋىل جاساپ, جابىرلەنۋشىلەردىڭ اقشاسى مەن باعالى زاتتارىن تارتىپ العان.
الماتى قالالىق پوليتسيا دەپارتامەنتىنىڭ كريمينالدىق پوليتسيا باسقارماسىنىڭ باستىعى تالانت يساەۆتىڭ ايتۋىنشا, جەدەل-ىزدەستىرۋ شارالارى بارىسىندا وسىنداي التى قىلمىس جاساعانىن مويىنداعان 26 كۇدىكتى ۇستالدى.
— كۇدىكتىلەردىڭ بارلىعى قاماۋعا الىندى, تەرگەۋ امالدارى جۇرگىزىلىپ جاتىر. ولاردىڭ باسقا دا قىلمىستارعا قاتىسى بار-جوعى تەكسەرىلۋدە. مۇنداي ارەكەتتەر تەك قۇرباندارعا عانا ەمەس, جالپى قوعامعا ۇلكەن قاۋىپ توندىرەدى, – دەدى يساەۆ.
ەسكە سالا كەتەيىك, بۇعان دەيىن پوليتسيا تانىسۋ سايتتارىن وزدەرىنىڭ قىلمىستىق ارەكەتتەرىنە پايدالاناتىن قىلمىستىق توپتاردىڭ بەلسەندىلىگى تۋرالى ەسكەرتىپ, ينتەرنەت ارقىلى تانىسقان كەزدە ساق بولۋعا شاقىرعان ەدى.
