الماتىنى جاسىلداندىرۋدىڭ شەبەرلىك-جوسپارىنىڭ جوباسى ازىرلەندى

الماتى اكىمى قالانى جاسىلداندىرۋدىڭ شەبەرلىك-جوسپارىنىڭ جوباسىن قاراعان جۇمىس جيىنىن وتكىزدى, ونىڭ بارىسىندا تاياۋداعى ءۇش جىل ىشىندە ميلليون اعاش وتىرعىزۋ ماسەلەسى ءسوز بولدى.

شەبەرلىك-جوپارىن جاساۋ كەزىندە قالانىڭ جاسىل جەلەكتەرى زەرتتەلدى جانە ونىڭ قازىرگى جاعدايى انىقتالدى. بۇل جۇمىسقا كاسىبي ماماندار تارتىلدى, ولار زەرتتەۋ بارىسىندا قالاداعى جاسىل جەلەكتىڭ جالپى كولەمى ءبىر ادامعا شاققاندا نەبارى 894 گا – 4.8 شارشى مەتر ەكەنىن انىقتادى. ال, سوناۋ 70-80 جىلدارى بۇل كورسەتكىش 10 شارشى مەترگە جەتكەن ەكەن. جاسىل جەلەك كولەمىنىڭ ازايۋى قالا كولەمى مەن ادام سانىنىڭ ارتۋىنا بايلانىستى بولۋدا.

ايتا كەتەرلىگى, سوڭعى ءۇش جىل ىشىندە 134 مىڭعا جۋىق اعاش وتىرعىزىلدى. اعىمداعى جىلى وتىرعىزىلعانى – 140 مىڭعا جۋىق.

مالىمەتتەرگە جۇگىنسەك, ميلليون اعاشتار مەن بۇتاقتار وتىرعىزۋدىڭ تيىمدىلىگى جوعارى. ياعني, جاسىل جەلەكتىڭ ارقاسىندا 118 ملن كگ وتتەگى پايدا بولادى, قالانى جاسىلداندىرۋ ايماعى 5000 شارشى مەترگە دەيىن جەتەدى, جول جيەگىندەگى شۋدىڭ دەڭگەيى 40%-عا, جاسىل ايماقتان 1 شارشى مەتر راديۋستاعى شاڭ دەڭگەيى 75%-عا تومەندەيدى.

سونىمەن قاتار, قالانى اباتتاندىرۋ دەڭگەيى ارتادى, دەمالىس ايماقتارى, سكۆەرلەر مەن ساياباقتار پايدا بولادى. مۇنىڭ بارلىعى پسيحولوگيالىق احۋالعا وڭ ىقپال ەتەدى جانە قالالىقتاردىڭ ءومىر سۇرۋىنە جايلى جاعداي جاسايدى.

«قالانى جاسىلداندىرۋدىڭ بارلىق جۇمىسى بىرىڭعاي جۇرگىزىلىپ, اعاشتاردى ستيحيالى تۇردە وتىرعىزۋعا نەمەسە قيۋعا بولمايدى. ءبىز سوندىقتان شەبەرلىك-جوسپارىن ازىرلەۋدەمىز», – دەپ اتاپ ءوتتى ب. ساعىنتاەۆ.

جيىندا دۇكەندەردىڭ, سالونداردىڭ جانە كاسىپكەرلىكتىڭ باسقا نىساندارىنىڭ سىرتىن جاۋىپ تۇراتىن اعاشتاردى كەسۋگە تىيىم سالىناتىنى اتالىپ ءوتتى. قايتارما اعاشتاردى وتىرعىزۋعا باقىلاۋ كۇشەيتىلەدى جانە كەسىلگەن اعاشتاردىڭ ورنىنا وتىرعىزىلاتىن جاسىل جەلەكتىڭ سانى ارتاتىن بولادى.

الماتى اكىمى ب. ساعىنتاەۆ شەبەرلىك-جوسپارىن تولىقتىرۋ بويىنشا بىرقاتار تاپسىرمالار بەردى. جالپى, ونىڭ مازمۇندىق بولىگى ناقتىلانۋى جانە ونى جۇزەگە اسىرۋدىڭ پارمەندى شارالارىنىڭ قاراستىرىلعانى ءجون. ونىڭ ىشىندە, پيتومنيكتەردىڭ قۋاتى, جاسىل جەلەكتى وتىرعىزۋدىڭ جانە ولاردى كۇتىپ-باپتاۋدىڭ بىرىڭعاي ءادىسى مەن ەرەجەسى ءجىتى نازارعا الىنۋى ءتيىس.