الپاۋىت دەرجاۆالار تەكەتىرەستە بولعان كەزدە, قازاقستان وتە ماڭىزدى ءرول اتقارا الادى – انتونيۋ گۋتەرريش

20 جىل بويى بۇۇ مەن شىۇ جاھاندىق ديالوگ جانە كليماتتىڭ وزگەرۋى, ورنىقتى دامۋ, سونداي-اق تەرروريزممەن كۇرەس سياقتى ماسەلەلەر بويىنشا تاجىريبە الماسۋعا باعىتتالعان سەرىكتەستىكتى ساقتاپ كەلەدى.

بۇل تۇرعىدا بۇۇ باس حاتشىسى شىۇ جانە بۇۇ سياقتى ۇيىمدار وسى ماسەلەلەر بويىنشا جاھاندىق ديالوگتى ىلگەرىلەتۋ ءۇشىن نە ىستەي الاتىنىن ءتۇسىندىردى.

«ەڭ الدىمەن, قاقتىعىستاردىڭ الدىن الۋدا بىرلەسىپ جۇمىس ىستەي الامىز. ياعني قاقتىعىسقا جول بەرمەۋگە بارىنشا كۇش سالۋ كەرەك. ءبىز تەرروريزمگە قارسى كۇرەستە بىرلەسە جۇمىس ىستەۋىمىز كەرەك. تەرروريزم الەمنىڭ وسى بولىگىندە ءالى دە قاۋىپ ءتوندىرىپ تۇر. سوندىقتان بۇۇ-نىڭ تەرروريزمگە قارسى باسقارماسى زورلىق-زومبىلىق ەكسترەميزمى مەن تەرروريزمگە قاتىستى ماسەلەلەر بويىنشا شانحاي ىنتىماقتاستىق ۇيىمىمەن تولىق ىنتىماقتاستىقتا جۇمىس ىستەۋگە دايىن. ەكىنشى جاعىنان, ەكى ۇيىم بەيبىتشىلىككە, ديالوگقا جانە پروبلەمالاردى شەشۋگە ەرەكشە ءمان بەرىپ وتىر», – دەدى انتونيۋ گۋتەرريش.

ونىڭ پايىمىنشا, بۇۇ مەن شىۇ ىنتىماقتاستىعى الەمنىڭ ءتۇرلى بولىكتەرىن بىرىكتىرۋگە جانە الپاۋىت دەرجاۆالار اراسىنداعى تەكەتىرەستەن كەلەتىن زالالدى شەكتەۋگە كومەكتەسەدى.

«الپاۋىت دەرجاۆالار ءبىر-بىرىنە قارسى بولعان كەزدە, قازاقستان سياقتى ەلدەر وتە ماڭىزدى ءرول اتقارادى. ال شانحاي ىنتىماقتاستىق ۇيىمى جانە بۇۇ سياقتى ۇيىمدار قاقتىعىستاردى شەشۋدە, حالىقارالىق ەكونوميكالىق قاتىناستاردا ادىلەتتىلىك ورناتۋدا, دامۋشى ەلدەردىڭ مۇددەسىنە وراي حالىقارالىق قارجى ينستيتۋتتارىن رەفورمالاۋ مەن ادام قۇقىقتارى سالاسىندا ءوزىنىڭ ماڭىزدى ۇلەسىن قوسادى. ادام قۇقىقتارى ەكونوميكالىق, الەۋمەتتىك, مادەني, ساياسي جانە ازاماتتىق قۇقىقتاردى قامتيدى. بۇل ماسەلەلەردى بارشامىز بىرلەسە قاراستىرۋىمىز كەرەك, ياعني قوسارلانعان ستاندارتتارعا جول بەرمەۋ قاجەت. مەنىڭ ويىمشا, وسى قادامدار ادام قۇقىقتارى سالاسىنداعى پروگرەسكە ىقپال ەتەدى جانە ءتۇرلى داۋ-دامايعا توسقاۋىل قويادى», – دەدى بۇۇ باس حاتشىسى.

ايتا كەتەيىك, بۇگىن بۇۇ باس حاتشىسى انتونيۋ گۋتەرريش شانحاي ىنتاماقتاستىق ۇيىمىنىڭ كونفەرەنتسياسىنا قاتىسادى.