Álem jańalyqtary
Alpaýyt derjavalar teketireste bolǵan kezde, Qazaqstan óte mańyzdy ról atqara alady – Antonıý Gýterrısh
Foto: aif.ru
Astanadaǵy ShYU sammıtiniń qarsańynda BUU Bas hatshysy Antonıý Gýterrısh Silk Way-ge bergen eksklıýzıvti suhbatynda atalǵan sammıt pen Qazaqstannyń osy uıymdaǵy róli týraly pikirin bildirdi.
20 jyl boıy BUU men ShYU jahandyq dıalog jáne klımattyń ózgerýi, ornyqty damý, sondaı-aq terrorızmmen kúres sııaqty máseleler boıynsha tájirıbe almasýǵa baǵyttalǵan seriktestikti saqtap keledi.
Bul turǵyda BUU Bas hatshysy ShYU jáne BUU sııaqty uıymdar osy máseleler boıynsha jahandyq dıalogty ilgeriletý úshin ne isteı alatynyn túsindirdi.
«Eń aldymen, qaqtyǵystardyń aldyn alýda birlesip jumys isteı alamyz. Iaǵnı qaqtyǵysqa jol bermeýge barynsha kúsh salý kerek. Biz terrorızmge qarsy kúreste birlese jumys isteýimiz kerek. Terrorızm álemniń osy bóliginde áli de qaýip tóndirip tur. Sondyqtan BUU-nyń Terrorızmge qarsy basqarmasy zorlyq-zombylyq ekstremızmi men terrorızmge qatysty máseleler boıynsha Shanhaı yntymaqtastyq uıymymen tolyq yntymaqtastyqta jumys isteýge daıyn. Ekinshi jaǵynan, eki uıym beıbitshilikke, dıalogqa jáne problemalardy sheshýge erekshe mán berip otyr», – dedi Antonıý Gýterrısh.
Onyń paıymynsha, BUU men ShYU yntymaqtastyǵy álemniń túrli bólikterin biriktirýge jáne alpaýyt derjavalar arasyndaǵy teketiresten keletin zalaldy shekteýge kómektesedi.
«Alpaýyt derjavalar bir-birine qarsy bolǵan kezde, Qazaqstan sııaqty elder óte mańyzdy ról atqarady. Al Shanhaı yntymaqtastyq uıymy jáne BUU sııaqty uıymdar qaqtyǵystardy sheshýde, halyqaralyq ekonomıkalyq qatynastarda ádilettilik ornatýda, damýshy elderdiń múddesine oraı halyqaralyq qarjy ınstıtýttaryn reformalaý men adam quqyqtary salasynda óziniń mańyzdy úlesin qosady. Adam quqyqtary ekonomıkalyq, áleýmettik, mádenı, saıası jáne azamattyq quqyqtardy qamtıdy. Bul máselelerdi barshamyz birlese qarastyrýymyz kerek, ıaǵnı qosarlanǵan standarttarǵa jol bermeý qajet. Meniń oıymsha, osy qadamdar adam quqyqtary salasyndaǵy progreske yqpal etedi jáne túrli daý-damaıǵa tosqaýyl qoıady», – dedi BUU Bas hatshysy.
Aıta keteıik, búgin BUU Bas hatshysy Antonıý Gýterrısh Shanhaı yntamaqtastyq uıymynyń konferenııasyna qatysady.
