«التىن وردا» بازارىنداعى قۇرىلىستىڭ سالىمشىلارى توقاەۆقا ۇندەۋ جاسادى

«التىن وردا» بازارىندا سالىنىپ جاتقان 3 پاۆيلون سالىمشىلارى قاسىم-جومارت توقاەۆقا ۇندەۋ جاسادى. «التىن وردا» بازارىنىڭ بۇرىنعى باسشىسى دانيار الپيەۆكە الداندىق» دەگەن ساۋداگەرلەر  «الپيەۆتىڭ ايەلى مەن ادۆوكاتى الەۋمەتتىك جەلىلەر ارقىلى اقپاراتتىق مانيپۋلياتسيا جاساپ, تەرگەۋگە اسەر ەتۋ ءۇشىن ءتۇرلى ايلا-شارعى جاساۋدا» دەپ الاڭداۋلى, دەپ حابارلايدى دەپ حابارلايدى qandastar.kz Skifnews.kz اقپارات پورتالىنا سىلتەمە جاساپ.

الپيەۆتىڭ ايەلى الما الپيەۆا بۇعان دەيىن «الەۋمەتتىك جەلىدە «التىن وردا» بازارىندا جۇمىس ىستەمەيتىن جانە جالعان سالىمشىلار سۇحبات بەرۋدە» دەگەن بولاتىن. الايدا بۇگىن قۇرىلىس باسىنا جينالعان ۇلەسكەرلەر الماگۇل الپيەۆانىڭ ءسوزىن جوققا شىعاردى.

«ءبىز «التىن ورداداعى» قۇرىلىسقا سالىمشىمىز. سالىمشى رەتىندە توقاەۆقا ۇندەۋ جاسايمىز. بىرىنشىدەن, دانيار الپيەۆتىڭ ايەلى بىزگە جالا جابۋدى توقتاتسىن. ءبىز جالعان ادام ەمەسپىز, ءبارىمىز سالىمشىمىز. ەكىنشىدەن, بۇكىل قۇجاتتى جيناپ الىپ كەتكەن مارجان ەسجانوۆاتابىلسىن. ۇشىنشىدەن, دانيار الپيەۆ 300-دەن استام سالىمشىدان جيناعان اقشانى قايتارسىن», — دەيدى پرەزيدەنتتەن اراشا سۇراعان سالىمشىلار.

الپيەۆتىڭ ايەلى «جالعان سالىمشى» دەپ اتاعان جاننىڭ ءبىرى – گۇلايىم ماقاشەۆا. ول پاۆيلون قۇرىلىسىنا 4 ميلليون تەڭگە سالعان. ونىڭ سوزىنشە, «جالعان سالىمشى» دەپ ايىپتاعان الپيەۆتىڭ ايەلى جالا جاۋىپ وتىر.

«مەن «التىن وردا» بازارىندا 2004 جىلدان بەرى جۇمىس جاسايمىن. قۇرىلىسقا 2024 جىلدىڭ قازان ايىنان باستاپ قاراجات قۇيىلا باستادى. الپيەۆتىڭ ايەلى مەنى «جالعان سالىمشى» دەپ بۇكىل الەۋمەتتىك جەلىلەردە ايتىپ جاتىر. كەزىندە سۇحبات بەرگەندە تەگىمدى گۇلايىم سيزياباي دەپ قازاقشا ايتقانمىن. نەگىزىندە تەگىم گۇلايىم ماقاشەۆا. ال ولار «ءسىز سالىمشى ەمەسسىز» دەپ جالا جاۋىپ جاتىر. اليپەۆ كەزىندەگى قولىما بەرىلگەن چەكتە گۇلايىم ماقاشەۆا دەپ جازىلعان. جانە ولار قازىر مەنى بەلسەندىلىك تانىتقانىم ءۇشىن سوتقا بەرىپ جاتىر. ولار تەك بىزگە چەك بەرىپ كەلدى, كەلىسىم-شارت جاسالمادى. ءبىز بەس-التى اي بويى كەلىسىم-شارت سۇراعاندا بەرمەي كەلدى. اقىرىندا باسشىلىق اۋىستى. سودان كەيىن دانياردى ەكى اي كۇتتىك. كەلمەدى. سوسىن وسى 300 سالىمشىنىڭ سالعان قاراجاتىن مويىنداتۋ ءۇشىن قۇزىرلى ورىندارعا ارىز جازدىق», — دەيدى گۇلايىم ماقاشەۆا.

سالىمشىلاردىڭ ايتۋىنشا, دانيار الپيەۆ بازار باسشىلىعىندا تۇرعان كەزدە ارقايسى ءتۇرلى كولەمدە جاڭا پاۆيلوننىڭ قۇرىسىلىنا اقشا سالعان. جالپى سانى 300 سالىمشى 1 ميلليارد 600 تەڭگە كولەمىندە قاراجات قۇيعان.

تاعى ءبىر سالىمشى جادىرا قايشاەۆانىڭ الپيەۆتىڭ كەسىرىنەن ءالى كۇنگە دەيىن دالاداعى ساۋدا نۇكتەسىندە جۇرگەنىن ايتادى. ال «شىندىقتى ايتقانىمىز ءۇشىن كىنالىمىز» دەگەن سالىمشىلاردىڭ ءبارى الماگۇل الپيەۆانىڭ جاپقان جالاسىن تۇسىنبەي الەك.

«قىزداردىڭ ۇستىنەن جالا جاۋىپ جاتىر. ولار «2024 جىلدىڭ اياعىندا قۇرىلىستى بىتىرەمىز دەپ ايتقانبىز» دەيدى. نەگىزىندە 10 ايدا ءبىتىرىپ بەرەمىز دەگەن. الپيەۆ سولاي ايتقان. ال قازىر الپيەۆتىڭ ايەلى باسقالاي سايراپ جاتىر. بىراق ايتىلعان ۋاقىتتا قۇرىلىس بىتپەدى. ەكى جىلعا سوزىلىپ كەتتى. ولار قۇرلىستىڭ تورتتەن ءبىرىن عانا جاسادى. قۇدايعا شۇكىر, قازىر جاڭا باسشىلىق كەلىپ, قۇرىلىس جاقسى جۇرىپ جاتىر», — دەيدى جادىرا قايشاەۆا.

ەستەرىڭىزگە سالايىق, «التىن وردا» امبەباپ ساۋدا كەشەنىن جالعا العان دانيار الپيەۆتىڭ باسشىلىعىنداعى «Altyn Orda New Company» جشس ءۇشىنشى پاۆيلوندى سالۋ ءۇشىن 300-دەن استام ۇلەسكەردەن زاڭسىز قاراجات جيناعان. بازاردىڭ باسقارۋشى كومپانياسى «كومپانيا نومەر ودين» جشس ديرەكتورى الەكساندر نەدوگاركو ءوز سوزىندە ۇلەسكەرلەرگە ساۋدا كەشەنىنىڭ قۇرىلىس جۇمىستارىمەن اينالىساتىن جاڭا «پرايم ستروي XXI» جشس قۇرىلىس كومپانياسىمەن تانىستىرىپ, كاسىپكەرلەردىڭ ساۋدا ورىندارىنسىز قالماۋىن قامتاماسىز ەتۋدى اتالعان قۇرىلىس كومپانياسىمەن بىرگە جاۋاپكەرشىلىككە الاتىندارىن اتاپ وتكەن بولاتىن. قازىر قۇرىلىس جۇمىستارى قارقىندى ءجۇرىپ جاتىر. ال بۇرىنعى باسشى دانيار الپيەۆ قازىر تەرگەۋ اباقتىسىنا قامالعان.

ايتا كەتەيىك, بۇگىنگى جيىندا دانيار الپيەۆتىڭ ادۆوكاتى توبە كورسەتكەن ەدى. الايدا ول سالىمشىلاردىڭ سانداعان سۇراقتارىنا ماردىمدى جاۋاپ بەرە المادى. ال بازاردىڭ باسقارۋشى كومپانياسى «Big City Market» جشس زاڭگەرى ءىزباسار وتەۋلين بولسا, الپيەۆتىڭ ادۆوكاتىنىڭ سوزىندە قاراما-قايشىلىق كوپ ەكەنىن ايتادى.

«قازىرگى ۋاقىتتا دانيار الپيەۆتەن جاپا شەككەن 300-دەن استام ۇلەسكەردىڭ شاعىمى الماتى وبلىسىنىڭ پد تىركەلىپ تۇر. بۇگىن سويلەگەن دانيار الپيەۆتىڭ ادۆوكاتىنىڭ كوپ ءسوزىن جالعان دەپ تانيمىز, سەبەبى الپيەۆ بازاردى جالعا الۋشى ديرەكتور بولسا دا, وعان سالىمشىلاردان الدىن-الا اقشا جيناۋ قۇقىعى بەرىلمەگەن. الپيەۆتىڭ كومپانياسى اقشانى اۋداردىق دەيدى, بىراق ارتىنان انىقتالعانداي, ول اۋدارىلعان اقشا زارداپ شەككەن ۇلەسكەرلەرگە ەمەس, سول تۇستا ءۇشىنشى پاۆيلوننىڭ قۇرىلىسىمەن اينالىسقان ءوزىنىڭ دوسىنا اۋدارعان. ياعني تۇپتەپ كەلگەندە ءوز-وزىنە اۋدارعان بولىپ تۇر. قازىرگى ۋاقىتتا قۇرىلىس جۇمىستارىن بازاردىڭ جاڭا باسقارۋشى كومپانياسى جالعاستىرۋدا», — دەدى ءىزباسار وتەۋلين.