جاڭالىقتار
«AMANAT» پەريزات قايرات پەن Biz Birgemiz قورىنا قاتىستى اقپاراتقا جاۋاپ بەردى.
فوتو: اشىق دەرەككوز
«AMANAT» دەپۋتاتتارى ءماجىلىس كۋلۋارىندا پەريزات قايرات پەن Biz Birgemiz قورىنا پارتيانىڭ قاتىسى بار دەگەن قاۋەسەتكە جاۋاپ بەردى, – دەپ حابارلايدى qandastar.kz
«بۇل قوردىڭ پارتياعا ەش قاتىسى جوق. بۇل جەكە قور. بۇل قوردىڭ قۇرىلتايشىسى بولعان بىرقاتار ادام بار. ءيا, ولار «AMANAT» پارتياسىنىڭ مۇشەلەرى, ونىڭ ىشىندە ەكى ادام. 2021 جىلى ولار بەلسەندى ءارى ۆولونتەر بولدى. ولاردىڭ ماقساتى قايىرىمدىلىقپەن اينالىساتىن قوعام قۇرۋ ەدى… ءيا, بۇل جىگىتتەر بىزدە جۇمىس ىستەيدى, بىرەۋى جاۋاپتى حاتشى», – دەدى بەيسەمباەۆ.
ونىڭ ايتۋىنشا, ولار قوردى ءۇش جىل بۇرىن قۇرعان.
«مەن بۇل قور تۋرالى ەشتەڭە ەستىگەن جوقپىن, بىراق سۋ تاسقىنىنان كەيىن بەلگىلى ءبىر مولشەردە اقشا ءتۇسىپ, پەريزات قايراتقا قاتىستى ماسەلە بار ەكەنىن بىلدىك. تەرگەۋ مۇنىمەن اينالىسادى دەپ ويلايمىن. پاندەميا كەزىندە جۇمىس ىستەگەن بۇل قور Biz Birgemiz دەپ اتالدى, ال قازىرگى قور «Biz Birgemiz Qazaqstan 2030″ دەپ اتالادى. ونىڭ بۇل قورعا قانداي قاتىسى بولۋى مۇمكىن? ەشقانداي», – دەپ اتاپ ءوتتى بەيسەمباەۆ.
«AMANAT» پارتياسى وكىلدەرىنىڭ قورعا قاتىسى تۋرالى اقپاراتقا دەپۋتات سەرگەي پونومارەۆ تە تۇسىنىكتەمە بەردى.
«مەن ەندى عانا بىرنەشە ەسىمدى كوردىم. مەن ءبىر عانا نارسەنى ايتا الامىن, الاياقتار سونشالىقتى قۋ, ولار ۇلتىنا, پارتياسىنا, دىنىنە قاراماستان كەز كەلگەن حالىقتىڭ سەنىمىنە يە بولۋى مۇمكىن. ءتيىستى ورگاندار انىق-قانىعىن تەكسەرەدى», – دەدى دەپۋتات.
ەسكە سالايىق, 14 قاراشادا قايىرىمدىلىق قورىنىڭ قۇرىلتايشىسى پەريزات قايرات كوكتەمگى سۋ تاسقىنى كەزىندە حالىقتان جينالعان 1,5 ملرد تەڭگەنى جىمقىردى دەگەن كۇدىكپەن ۇستالعانى ءمالىم بولدى. قارجىلىق مونيتورينگ اگەنتتىگى وكىلدەرىنىڭ مالىمدەۋىنشە, پەريزات قايرات قورعا تۇسكەن اقشانىڭ نەگىزگى بولىگىن جىلجىمايتىن م ۇلىك پەن باعالى زاتتار ساتىپ الۋعا جۇمساعان. سونىمەن قاتار پەريزات قايرات پارا ۇستەل تەننيسى فەدەراتسياسىنىڭ باسشىسى قىزمەتىنەن بوساتىلعانى بەلگىلى بولدى. 16 قاراشادا قما وكىلدەرى پەريزات قايرات پالەستينا تۇرعىندارىنا جينالعان قارجىدان 200 ملن تەڭگەدەن اسا قاراجاتتى جىمقىردى دەپ تاعى ءبىر كۇدىككە ىلىنگەنىن حابارلادى. كەيىن استانا سوتى بۇلتارتپاۋ شاراسىمەن پەريزات قايرات ەكى اي مەرزىمگە قاماۋعا الىنعانىن حابارلادى.
