انتيكور تەگىن ءدارى-دارمەكتەردى بەرۋ جۇيەسىنە وزگەرىس ەنگىزدى

فوتو: اشىق دەرەككوز

سىبايلاس جەمقورلىققا قارسى قىزمەتتىڭ ۇسىنىسى بويىنشا تەگىن ءدارى-دارمەكتەردى بەرۋ جۇيەسىنە وزگەرىس ەنگىزىلەدى, دەپ حابارلايدى  qandastar.kz   ۆەدومستۆونىڭ ءباسپاسوز قىزمەتىنە سىلتەمە جاساپ.

اباي وبلىسىندا دەنساۋلىق ساقتاۋ سالاسىنا جۇرگىزىلگەن جەمقورلىق تاۋەكەلدەرىنە سىرتقى تالداۋ بارىسىندا (2024 ج.) بىرىڭعاي ديستريبيۋتور – «سك-فارماتسيا» جشس مەديتسينالىق پرەپاراتتاردى ۋاقىتىلى جەتكىزبەۋ فاكتىلەرى انىقتالدى.

بۇل تاجىريبە تەگىن ءدارى-دارمەكتەردىڭ جەتىسپەۋشىلىگىنە جانە پاتسيەنتتەردىڭ ولاردى ءوز قاراجاتىنا ساتىپ الۋىنا الىپ كەلدى.

مەديتسينالىق مەكەمەلەردە ناقتى جاعدايدى جاسىرۋ ءۇشىن «جالعان رەتسەپتەر» جازىلعان. قۇجاتتارعا سايكەس پاتسيەنتتەر ءدارى-دارمەكتەرمەن تولىق قامتاماسىز ەتىلگەن.

تالداۋ قورىتىندىسى بويىنشا اباي وبلىسىنىڭ بارلىق ەمحانالارىندا EGOV Mobile قوسىمشاسىنىڭ «الەۋمەتتىك ءامين» بولىمىندە QR-كود ارقىلى پاتسيەنتتەرگە تەگىن ءدارى-دارمەك بەرۋ جۇيەسى ەنگىزىلدى.

قازىرگى ۋاقىتتا بۇل ءدارى-دارمەكتەردى الۋدىڭ بالاما ءادىسى, الايدا ول قازىردىڭ وزىندە وڭ ناتيجە كورسەتۋدە.

QR-كود ارقىلى پاتسيەنتتەرگە تەگىن ءدارى-دارمەك بەرۋ جونىندەگى جوبا پيلوتتىق رەجيمدە ىسكە قوسىلدى جانە قورىتىندىسى بويىنشا ونى بارلىق رەسپۋبليكا بويىنشا ماسشتابتاۋ جوسپارلانۋدا.

2024 جىلى پاتسيەنتتەر سانىنىڭ 14%-عا وسۋىنە قاراماستان (2023 ج. – 77,6 مىڭ, 2024 ج. – 88,8 مىڭ), اباي وبلىسىندا جازىلعان رەتسەپتتەر سانىنىڭ 24,8 مىڭعا تومەندەۋى بايقالادى (2023 ج. – 707,6 مىڭ رەتسەپت, 2024 ج. – 682,4 مىڭ رەتسەپت).

زاماناۋي تسيفرلىق شەشىمدەردى ەنگىزۋ جالعان رەتسەپتتەردى شىعارۋ, ءدارى-دارمەكتەردى جىمقىرۋ قاۋپىن ەداۋىر ازايتىپ, بيۋدجەت قاراجاتىن ۇنەمدەيدى.