«Aporttan aıyrylýymyz múmkin»: Sharýa ıeleri prokýratýra qysym kórsetip jatqanyn aıtyp, prezıdentten kómek surady

Foto: vıdeodan skrın

Almaty oblysynyń burynǵy Qarasaı aýdany aýmaǵyndaǵy alma baqtaryna ıelik etetin «Halyqaralyq klýbtar qaýymdastyǵy» JShS ókilderi prezıdentke júginip, prokýratýra áreketterinen qorǵaýdy surady. Olardyń aıtýynsha, quzyrly organ olardyń jerge menshik quqyǵyn jaramsyz dep tanýǵa tyrysyp jatyr. Bul týraly qandastar.kz Stan.kz aqparat agenttigine silteme jasap habarlaıdy.

Vıdeoda fermerler keıingi 20 jylda almatylyq aport pen basqa da alma sorttaryn ósirip, jerdi maqsatty túrde paıdalanyp kele jatqanyn alǵa tartady.

“Qurmetti Qasym-Jomart Kemeluly, biz Almaty qalasy prokýratýrasynyń bizdi jumystan aıyrýǵa jáne Almatynyń taý bókterindegi alma baqtaryn joıýǵa baǵyttalǵan áreketterinen qorǵanýdy surap, sizge júginip otyrmyz. Jaqynda Bostandyq aýdanynyń prokýratýrasy Almaty qalasynyń ekonomıkalyq sotyna «Halyqaralyq klýbtar qaýymdastyǵy» JShS-niń 2004 jyldan beri ıelik etip kele jatqan jer ýchaskelerine menshik quqyǵyn jaramsyz dep taný týraly talap-aryz berdi. Prokýratýranyń menshik quqyǵynan aıyrý sebebi retinde ýchaskelerdiń birinen «Kereńqulaq» ózeniniń ótýi kórsetilgen. Alaıda nege ekeni belgisiz, Remızov saıynan Ál-Farabı dańǵylyna deıin sozylatyn Kereńbulaq ózeni boıynda ornalasqan elıtalyq turǵyn úı keshenderiniń ıelerine prokýratýra tarapynan eshqandaı suraq týyndamaıdy. Qurmetti prezıdent myrza, biz bul ýchaskelerdi maqsatty túrde paıdalanyp kelemiz. Munda múldem qurylys pen kottedjder joq”, – dep aǵynan jaryldy sharýalar.

Sharýalar almatylyq aportty ósirip, ony qala turǵyndary men elimizdiń qonaqtaryna usynyp júrgenin aıtty.

“Qurmetti prezıdent myrza, siz jaqynda Italııada bolyp, Birikken Ulttar Uıymynyń qyzmetkerlerin osy jerde, óz qolymyzben ósirgen Almatylyq aportpen qonaq ettińiz. Siz árdaıym bizdiń Almatylyq aportty qorǵap, saqtap qalý kerek ekenin aıtasyz. Sońǵy joldaýyńyzda siz jer paıdalanýshy adal jumys istep, ınvestıııa quısa, qoldanystaǵy óndiristi buzýǵa bolmaıtynyn aıttyńyz. Alaıda prokýratýra úshin sizdiń bul sózderińizdiń esh mańyzy joq. Biz bul jerlerdi elıtalyq turǵyn úı salý úshin kez kelgen jolmen tartyp almaq ekenin túsinemiz. Qurmetti Qasym-Jomart Kemeluly, biz Konstıtýııaǵa sáıkes quqyqtarymyzdyń kepili retinde sizden kómek suraýǵa májbúrmiz. Bul ótinishimizge nazar aýdaryp, prokýratýranyń áreketin toqtatasyz dep úmittenemiz. Bizdiń otbasylarymyz kúnkórissiz qalady”, – dep kúıindi jumysshylar.

Buǵan deıin sharýalar bas kóterip, bul aǵashtardyń jasy 70 jyldan asqanyn, olar 50-jyldardan beri ósip kele jatqanyn aıtyp vıdeo túsirdi.

Bul aǵashtar eski, al olardyń butaqtary tegis. Biz osylardy arnaıy qaldyryp otyramyz. Biz Almaty aportynyń geografııalyq statýsy men brendine ıe boldyq. Iaǵnı kartaǵa belgilegende dál osy jerde aporttyń ósetini kórsetiledi. Iá, biz birneshe urpaqtan beri almatylyq aportty ósirip kelemiz. Jańbyr jaýyp, úsik pen burshaq bolmasa eken dep duǵa jasaımyz. Bul jerde úlken paıda úshin júrgen joqpyz, kerisinshe, osy baqqa kóp kúsh, ýaqyt, densaýlyǵymyzdy saldyq. Osy jerden ketý óte qıyn, biz úshin munda tek aqsha emes, eńbegimiz, janymyz bar», – dedi sharýalardyń biri Ivan Sergeev.

Vıdeokadrda sharýalardyń biri baq mańaıyndaǵy qymbat úılerdi, ıaǵnı Ermensaıdy kórsetti. Turǵyndar sýdyń joqtyǵyna sharýalardy kinálap jatqan kórinedi.

«Bul jerde buryn alma baqtary bolǵan. Bul úıler, negizinde, ataqty aport baqtarynyń «zıratynda» tur. Mynaý sol aǵashtardan qalǵan sońǵy túp. Mine, qurylys olarǵa da jaqyndap qaldy. Kelesi kóktemde tipti osy sońǵy aǵashtar da qalmaıtyn shyǵar dep oılaımyn. Osy turǵan turǵyn úı kesheniniń ornynda da baq boldy. Ony halyq arasynda «Mahabbat baǵy» dep ataıtyn. Qalǵany – tek osy ǵana. Bizdi ne kútip tur? Jolbarystardy joǵaltqanymyzdaı, aportty da joǵaltamyz. Eki brendti joǵaltýǵa bolmaıdy. Eger bul jerlerdi tartyp alsa, jaǵdaı múshkil. Qalǵan baqtardyń fonynda bul – tikeleı eskertý. Aport qazir tek «Qazaqfılmde» ǵana qaldy, biraq onyń baǵasy da qymbattap barady», – dedi almatylyq sharýalar.

Istiń jaı-japsaryn prokýratýra tarqatyp berdi. Olardyń aıtýynsha, alma baq qaı kezde de memleket menshiginde qala beredi.

«Halyqaralyq klýbtar qaýymdastyǵy» JShS-niń 884,9 gektar jerge menshik quqyǵyn 2004 jylǵy 17 maýsymda alǵanyn habarlaıdy. 2015 jyly bul jer ýchaskesi bólinetin aýmaq retinde tanylyp, jalpy kólemi 820 gektarǵa deıin azaıtylǵan. Ýchaske aýmaǵynan Kereńqulaq ózeni men Berqara bulaǵy aǵyp ótedi. Bul jerler, Qarasaı aýdany ákimdigi qaýly shyǵarǵan kezde qoldanysta bolǵan Jer kodeksiniń 132, 133-baptaryna sáıkes sý qorynyń jerleri bolyp sanalady jáne tek memlekettik menshikke jatady«, – dep málimdedi prokýratýra.

Prokýratýranyń sózinshe, sý qorynyń quramyndaǵy mundaı jerler tek sý resýrstaryn basqarý salasyndaǵy ýákiletti organdarmen kelisim boıynsha ýaqytsha jer paıdalaný quqyǵynda ǵana berilýi múmkin.

«Buǵan baılanysty 7 qazanda prokýratýra Almatynyń mamandandyrylǵan aýdanaralyq ekonomıkalyq sotyna jerge menshik quqyǵyn rastaıtyn qujattardy jaramsyz dep taný týraly talap-aryz berdi. Sot qaraýynyń nátıjesinde quqyqtyq baǵa berilip, tıisti sheshim qabyldanady», – dedi prokýratýra.