«اراقتى قيناپ ىشكىزىپ, تەرەزەدەن لاقتىرىپ جىبەرگەن»: استانادا 19 جاستاعى ۇلىنان ايىرىلعان انا ادىلدىكتى تالاپ ەتەدى

فوتو: جەكە قورىنان

استانادا 19 جاستاعى جىگىت ماس كۇيىندە تۇرعىن ءۇيدىڭ توعىزىنشى قاباتىنان قۇلاپ قازا تاپتى دەگەن اقپارات تارادى. مارقۇمنىڭ اناسى لاريسا سالباەۆانىڭ ايتۋىنشا, ۇلىنىڭ جوعارىدان وزدىگىنەن قۇلاپ كەتۋى مۇمكىن ەمەس. سەبەبى بالاسى مۇلدە ىشپەيدى, شەكپەيدى. بۇعان دەيىن تەك سپورتپەن اينالىسقان. قايعىلى قازاعا تاپ بولعان وتباسى بۇل ىستە مەدەتتى دوس بالدارى ءولتىردى مە دەپ كۇدىكتەنەدى. سەبەبى ءۇي قابىرعاسى مەن ەدەندە قان ىزدەرى بولعان. مارقۇمنىڭ اناسى qandastar.kz Stan.kz تىلشىسىنە قايعىلى وقيعانىڭ ءمان-جايىن ايتىپ بەردى.

مارقۇمنىڭ اناسى لاريسا سالباەۆانىڭ سوزىنشە, بالاسى قايعىلى وقيعا بولعان كۇنى دوستارىما بارىپ, سول جەردە قونامىن دەپ ايتىپ كەتكەن.

« ۇلىم «دوستارىما بارامىن, بىرگە وقيتىن كۋرستاستارىم, ءار اپتا بارىپ جۇرەتىن ەدىم” دەدى. جەلىدە ۇلىمدى ء«وزى ءىشتى, قۇسامىن دەپ ءوزىن بالكوننان لاقتىرىپ جىبەردى” دەگەن اقپارات تاراپ جاتىر. مەن بۇل اڭگىمەلەرمەن مۇلدەم كەلىسپەيمىن. ءوز بالاما سەنەمىن. ويتكەنى ۇلىم ىشپەيتىن, قانشاما جىلدان بەرى سپورتپەن اينالىسىپ كەلە جاتىر. وقيعا ورنىندا بالامنان بولەك ءتورت جىگىت بولعان. ولار قىلمىستى 2-3 ايدان بەرى ويلاستىرعان. بۇل مەن ءۇشىن جۇمباق ءولىم. تورتەۋى ۇلىما اراقتى قيناپ ىشكىزگەن بولۋى مۇمكىن. اراققا بىردەڭە قوسقان دا شىعار. ءسويتىپ ولار مەنىڭ بالامدى لاقتىرىپ جىبەرىپ وتىر», – دەيدى مارقۇمنىڭ اناسى.

مارقۇمنىڭ اناسىنىڭ سوزىنشە, قايعىلى وقيعادان سوڭ ءبىر بالا قاشىپ كەتىپ, مەشىتكە تۇنەگەن.

ء«تورت بالانىڭ بىرەۋى كەتىپ قالىپتى. دەمالىستا اپكەمنىڭ ۇيىندە بولدىم دەيدى. ءبىر بالا مەشىتكە قاشىپ, سول جەردە تۇنەگەن. ىشكەن ادامدى مەشىتكە كىرگىزە مە? بىرەۋى بالامدى لاقتىرىپ جىبەرىپ, قالعان ءۇش بالا قاراپ وتىرادى دەگەنگە جەكە باسىم سەنبەيمىن. «اڭداۋسىزدا بولدى, ءوزى ءىشتى, ءوزى قۇلادى» دەيدى. ولار بالامنىڭ باسىن جارىپ, ءتىلىپ لاقتىرىپ جىبەرگەن. سەبەبى قابىرعانىڭ ءبارى قان. ءتىپتى قان بالكوننان تامشىلاپ, جەرگە تۇسكەن. جوعارىدان تومەنگە دەيىن قان بولىپ جاتىر. بۇل ىستە مەن ءوز بالاما سەنەمىن. ول ىشپەيدى, شەكپەيدى. كىنالى بالالاردىڭ جازاسىن العانىن, سوتتىڭ اشىق تۇردە, ءادىل وتكەنىن قالايمىن», – دەيدى مارقۇمنىڭ اناسى.

TikTok الەۋمەتتىك جەلىسىندە “زامەدەت” دەگەن ارنا پايدا بولدى. وندا مارقۇمنىڭ تۋىستارى, سىنىپتاستارى مەن دوستارى #زامەدەت دەگەن حەشتەگپەن ۆيدەوۇندەۋ جاريالاپ, ادىلدىك سۇراپ وتىر. ولار مارقۇمنىڭ ءوز وزىنە قول سالعانىنا سەنبەيتىنىن ايتىپ جاتىر.

«مەدەت ماس كۇيىندە وزىنە قول جۇمسادى, جوعارى قاباتتان ءوزى قۇلاپ ءتۇستى دەگەنگە سەنبەيمىز. ادىلدىكتى تالاپ ەتەمىز», – دەيدى ولار