جاڭالىقتار
ارال تەڭىزىندە سۋدىڭ كولەمى ارتتى
سولتۇستىك ارالدى ساقتاۋ جوباسىنىڭ العاشقى كەزەڭى ناتيجەسىندە تەڭىزدەگى سۋ كولەمى 42 پايىزعا ۇلعايىپ, 27 ملرد تەكشە مەترگە جەتتى, دەپ جازدى qandastar.kz
مينيسترلىكتىڭ Telegram-داعى ارناسىنداعى مالىمەت بويىنشا سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ ارال اۋدانىنىڭ تۇرعىندارىمەن ارال تەڭىزىنىڭ سولتۇستىك بولىگىن قالپىنا كەلتىرۋ جوباسىنىڭ ەكىنشى كەزەڭىن ىسكە اسىرۋ ماسەلەسىن تالقىلادى.
«سولتۇستىك ارالدى ساقتاۋ جوباسىنىڭ العاشقى كەزەڭ قورىتىندىسى بويىنشا تەڭىزدەگى سۋ كولەمى 42 پايىزعا ارتىپ, 27 ملرد تەكشە مەترگە جەتتى. تەڭىز سۋىنىڭ تۇزدىلىعى ءتورت ەسەگە جۋىق تومەندەپ, جىل سايىنعى بالىق اۋلاۋ كورسەتكىشى 8 مىڭ تونناعا دەيىن جەتتى», – دەلىنگەن حابارلامادا.
سۋ رەسۋرستارى جانە يرريگاتسيا مينيسترلىگى مالىمەتىنشە, 2024 جىلى ارالعا 2,6 ملرد تەكشە مەترگە جۋىق سۋ جىبەرىلگەن. ونىڭ ىشىندە سۋارۋ كەزەڭىندە رەكوردتىق كولەم – 1 ملرد تەكشە مەتر سۋ باردى.
ايتا كەتەيىك, سىرداريا سۋىن ساۋاتتى ءبولۋ جانە ونى ۇنەمدەۋدىڭ ناتيجەسىندە مۇمكىن بولعان, سالىستىرمالى تۇردە ايتساق, 2022 جىلى ارالعا بار بولعانى 816 ملن تەكشە مەتر سۋ جىبەرىلگەن.
«بۇل ناتيجەلەر – سوڭعى ەكى جىلدا جۇرگىزىلگەن جۇيەلى جۇمىستىڭ جەمىسى. ءبىز سۋ ۇنەمدەۋ, ترانسشەكارالىق وزەندەردەگى سۋ رەسۋرستارىن ءادىل ءبولۋ ماسەلەسىندە كورشىلەس ەلدەرمەن ءوزارا تۇسىنىستىككە قول جەتكىزىپ, ناقتى قادامدار جاسادىق. الداعى ۋاقىتتا دا وسىنداي كەلىسسوزدەردى جالعاستىرا وتىرىپ, ماڭىزدى سۋ قويمالارىنىڭ دەڭگەيىن تۇراقتى ۇستاپ تۇرۋعا بار كۇشىمىزدى سالامىز. ارالدى قالپىنا كەلتىرۋگە باعىتتالعان جوبا ەڭ الدىمەن ءوڭىردىڭ ەكولوگيالىق جاعدايىن جاقسارتۋعا, بالىق شارۋاشىلىعى مەن ءتۋريزمدى دامىتۋعا جانە حالىقتىڭ ءال-اۋقاتىن ارتتىرۋعا باعىتتالىپ وتىر», – دەدى سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ.
