Aral teńizinde sýdyń kólemi artty

Soltústik Araldy saqtaý jobasynyń alǵashqy kezeńi nátıjesinde teńizdegi sý kólemi 42 paıyzǵa ulǵaıyp, 27 mlrd tekshe metrge jetti, dep jazdy qandastar.kz

Mınıstrliktiń Telegram-daǵy arnasyndaǵy málimet boıynsha sý resýrstary jáne ırrıgaııa mınıstri Nurjan Nurjigitov Aral aýdanynyń turǵyndarymen Aral teńiziniń Soltústik bóligin qalpyna keltirý jobasynyń ekinshi kezeńin iske asyrý máselesin talqylady.

«Soltústik Araldy saqtaý jobasynyń alǵashqy kezeń qorytyndysy boıynsha teńizdegi sý kólemi 42 paıyzǵa artyp, 27 mlrd tekshe metrge jetti. Teńiz sýynyń tuzdylyǵy tórt esege jýyq tómendep, jyl saıynǵy balyq aýlaý kórsetkishi 8 myń tonnaǵa deıin jetti», – delingen habarlamada.

Sý resýrstary jáne ırrıgaııa mınıstrligi málimetinshe, 2024 jyly Aralǵa 2,6 mlrd tekshe metrge jýyq sý jiberilgen. Onyń ishinde sýarý kezeńinde rekordtyq kólem – 1 mlrd tekshe metr sý bardy.

Aıta keteıik, Syrdarııa sýyn saýatty bólý jáne ony únemdeýdiń nátıjesinde múmkin bolǵan, salystyrmaly túrde aıtsaq, 2022 jyly Aralǵa bar bolǵany 816 mln tekshe metr sý jiberilgen.

«Bul nátıjeler – sońǵy eki jylda júrgizilgen júıeli jumystyń jemisi. Biz sý únemdeý, transshekaralyq ózenderdegi sý resýrstaryn ádil bólý máselesinde kórshiles eldermen ózara túsinistikke qol jetkizip, naqty qadamdar jasadyq. Aldaǵy ýaqytta da osyndaı kelissózderdi jalǵastyra otyryp, mańyzdy sý qoımalarynyń deńgeıin turaqty ustap turýǵa bar kúshimizdi salamyz. Araldy qalpyna keltirýge baǵyttalǵan joba eń aldymen óńirdiń ekologııalyq jaǵdaıyn jaqsartýǵa, balyq sharýashylyǵy men týrızmdi damytýǵa jáne halyqtyń ál-aýqatyn arttyrýǵa baǵyttalyp otyr», – dedi sý resýrstary jáne ırrıgaııa mınıstri Nurjan Nurjigitov.