اسحات ايماعامبەتوۆ: كاسىبي اۋرۋلار ينستيتۋتى قايتا قۇرىلدى

فوتو: parlam.kz

پارلامەنت ءماجىلىسىنىڭ دەپۋتاتى اسحات ايماعامبەتوۆ ەڭبەك گيگيەناسى مەن كاسىبي اۋرۋلار عىلىمي ينستيتۋتى قايتادان ءوز الدىنا دەربەس ينستيتۋت رەتىندە قۇرىلاتىنىن ءمالىم ەتتى. بۇل تۋرالى ول Facebook پاراقشاسىندا جازدى, دەپ حابارلايدى Azattyq Rýhy.

ول ءسوز باسىندا دەپۋتات رەتىندە عىلىم پروبلەماسىن شەشۋگە قالاي اتسالىسقانىن قوزعاپ ءوتتى.

«الدىڭعى جىلى بىرنەشە ارىپتەسىممەن بىرگە ەڭبەك گيگيەناسى مەن كاسىبي اۋرۋلار عىلىمي ينستيتۋتىنا بارعاندا, ونى قايتادان دەربەس ينستيتۋت رەتىندە قۇرۋ تۋرالى ماسەلە كوتەرىلگەن ەدى. سوندا ءبىز بۇل ماسەلەنى شەشەمىز دەپ ۋادە بەرگەن بولاتىنبىز. ۇكىمەتپەن بىرلەسە وتىرىپ, ارنايى قاۋلى شىعارىلىپ, ينستيتۋت دەربەس ۇيىم رەتىندە قۇرىلدى. 1958 جىلى نەگىزى قالانعان بۇل ينستيتۋت بارلىق شاحتەر, مەتاللۋرگتەر جانە زياندى ەڭبەك جاعدايىندا جۇمىس ىستەيتىن 500 مىڭعا جۋىق ازامات ءۇشىن ەرەكشە ماڭىزعا يە. كەيىنگى جىلدارى ينستيتۋت ۋنيۆەرسيتەت قۇرامىنا كىرىپ, كەيبىر بولىمدەرى جابىلىپ, ءتىپتى جابىلۋ قاۋپى دە تۋىنداعان بولاتىن», – دەيدى اسحات ايماعامبەتوۆ.

ول ءوز سوزىندە اتالعان ينستيتۋتتىڭ جۇمىسىن قارجىلاندىرۋ ماسەلەسىن ءتيىستى ۆەدومستۆولار موينىنا الۋعا دايىن ەكەنىن قوزعاپ ءوتتى.

«ماسەلەنى شەشىپ بەرگەننەن كەيىن ەندىگى كەزەكتە وسى ينستيتۋتتىڭ ءتيىمدى جۇمىس ىستەۋى ءۇشىن تۇراقتى قارجىلاندىرۋ, زەرتتەۋلەر جۇرگىزۋ جانە جابدىقتاۋ ماسەلەلەرىن قاراستىردىق. كەزدەسۋگە قاتىسقان دەنساۋلىق ساقتاۋ ۆيتسە-ءمينيسترى مەن عىلىم ۆيتسە-ءمينيسترى وسى ماسەلەلەردى شەشۋگە اتسالىساتىنىن ايتتى», – دەپ جازدى ول.