استانا LRT-نىڭ بۇرىنعى باسشىسى تالعات ارداننىڭ تۇركيادان قاشان اكەلىنەتىنى بەلگىسى

استانا LRT كومپانياسىنىڭ بۇرىنعى باسشىسى تالعات اردان ۇستالعانىنا ءبىر اي وتسە دە, ءالى كۇنگە دەيىن تۇركيادا قالىپ وتىر. باس پروكۋروردىڭ ورىنباسارى اسەت شىنداليەۆ ونىڭ ەكستراديتسياسىنا قاتىستى سۇراققا جاۋاپ بەردى, دەپ حابارلايدى Qandastar.kz اقپارات پورتالى.

ءماجىلىس كۋلۋارىندا شىنداليەۆكە تالعات ارداندى نەگە ۇزاق ۋاقىت ۇستاماعانى تۋرالى سۇراق قويىلدى. ونىڭ ايتۋىنشا, ۇستالۋ جىلدامدىعى ىزدەستىرۋمەن اينالىساتىن جەدەل قىزمەتتەرگە بايلانىستى.

«ءبىزدىڭ قازاقستاندىق قىزمەتتەر شەتەلگە بارىپ, ىزدەۋ جۇرگىزە المايدى. شەتەلدىك ارنايى قىزمەتتەر ينتەرپول ارقىلى جۇمىس ىستەيدى. سوندىقتان ارداندى تۇركيا پوليتسياسى ۇستادى», – دەدى باس پروكۋروردىڭ ورىنباسارى.

ول سونداي-اق شەتەلدىك ارنايى قىزمەتتەرمەن ءوزارا ءىس-قيمىل مەحانيزمىن ءتۇسىندىردى.

«ءبىز ادامدى ىزدەۋگە جاريالايمىز, بۇل اقپارات ينتەرپولدىڭ بازاسىنا تۇسەدى جانە الەم بويىنشا ىزدەۋ باستالادى. ادام تابىلعان كەزدە, ونى ۇستاۋ شارالارى قابىلدانادى. وزدەرىڭىز بىلەتىندەي, تالعات اردان تۇركيادا ۇستالدى. قازىرگى تاڭدا ول تۇركيادا قاماۋدا وتىر. ول استاناعا ءالى جەتكىزىلگەن جوق. ءبىز تۇركيا جاعىنا بارلىق قاجەتتى قۇجاتتاردى جىبەردىك. قازىر ولار ماتەريالداردى قاراپ, شەشىم قابىلدايدى. ارداننىڭ قازاقستانعا قاشان ەكستراديتسيالاناتىنى ازىرگە بەلگىسىز. سەبەبى ەكستراديتسيا ماسەلەسى تۇركيا زاڭناماسىمەن رەتتەلەدى, ءبىز تۇرىك تاراپىنان بۇل پروتسەستى جەدەلدەتۋدى تالاپ ەتە المايمىز. بۇل – ولاردىڭ ىشكى پروتسەسى, ول ءوز زاڭدارىنا سايكەس جۇرەدى», – دەپ قوستى شىنداليەۆ.