«Astana Qazaqstan Team قازىردىڭ وزىندە ەۋروپاداعى مىقتى كوماندالاردىڭ ءبىرى»

«ادىرنا» ۇلتتىق پورتالىنىڭ ءتىلشىسى «Astana» كاسىبي سپورت كلۋبىنىڭ باس ديرەكتورى تاستانبەك قۇتجان ۇلى ەسەنتاەۆپەن سۇحباتتاسقان بولاتىن, سونى نازارلارىڭىزعا ۇسىنامىز:

– Astana Qazaqstan Team كومانداسىن ەۋروپالىق بەدەلدى كلۋبتاردىڭ ءوزى مىقتى باسەكەلەس سانايدى. بۇل, ارينە, ۇلكەن ەڭبەكتىڭ ارقاسى. كوماندا قالاي قۇرىلدى? بۇعان نە سەبەپ بولدى? كىمدەر مۇرىندىق بولدى? تاريحىنا از-كەم توقتالا وتسەڭىز…

استانانىڭ اتاۋى بۇگىندە حالىقارالىق قوعامداستىق تاراپىنان مويىندالىپ قانا قويعان جوق, سونىمەن قاتار سپورت الەمىندە دە استانانىڭ اتى جەر جارىپ ءجۇر. 2013 جىلى ەلباسىنىڭ جارلىعىمەن «استانا» كاسىپقوي پرەزيدەنتتىك كلۋبى قۇرىلىپ, سول كەزدەن باستاپ ونىڭ قاتارىنا «استانا» ۆەلوكومانداسى كلۋبى كىردى. پرەزيدەنتتىك كلۋب قۇرامىنا كىرەتىن كوماندالاردىڭ بارلىعى   حالىقارالىق ارەنادا ونەر كورسەتتى. دۇرىس ايتاسىز, الەمدىك ۆەلوسپورت الاڭىندا مىقتىلارعا باسەكەلەس بولىپ تانىلعان  «Astana Qazaqstan Team» ۆەلوكومانداسى  جىلدان جىلعا تاجىريبەلەرى مەن شەبەرلىكتەرى شىڭدالىپ بايگەلەردە توپ جارىپ ءجۇر.

2006 جىلى Liberty Seguros-Würth كومانداسى باستى دەمەۋشىسى Liberty Mutual-دىڭ قولداۋىنان ايىرىلىپ قالدى. كەيىن كەلە Würth-تە كوماندامەن كەلىسىم-شارتتى ءۇزدى. بۇل كوماندانىڭ ۇزدىكتەرى رەتىندە قازاقستاندىق الەكساندر ۆينوكۋروۆ پەن اندرەي كاشەچكين سانالاتىن. سول ۋاقىتتاعى پرەمەر-مينيستر ءارى قازاقستان ۆەلوسپورت فەدەراتسياسىنىڭ توراعاسى دانيال احمەتوۆتىڭ قولداۋىمەن جاڭا كوماندا دۇنيەگە كەلىپ, وعان وتاندىق 5 ۇزدىك كومپانيا دەمەۋشىلىك تانىتتى. كوماندا ەلوردانىڭ قۇرمەتىنە, «Astana» دەگەن اتاۋ الدى. العاشقى جەڭىستەر سول جىلى-اق كەلىپ جەتتى. كوماندانىڭ باس جۇلدىزى الەكساندر ۆينوكۋروۆ يسپانيا ۆۋەلتاسىندا جەڭىسكە جەتسە, كوماندالاسى كاشەچكين ءۇشىنشى ورىنعا تۇراقتادى.

– اتاۋى وزگەرگەن كوماندادا ساپالىق وزگەرىستەر دە بار ما? حالىقارالىق تۋرلاردا قازاقستاندىق ۆەلوكلۋبتىڭ بيىكتەردى باعىندىرۋعا مۇمكىندىكتەرى قانداي?

17-ماۋسىمعا دايىندىعىن پىسىقتاپ جاتقان وتاندىق كوماندا جەيدەسىندە الەمنىڭ 7 ەلىنەن, اتاپ ايتقاندا قازاقستان, يتاليا, كولۋمبيا, يسپانيا, اقش, بەلارۋس جانە وڭتۇستىك افريكا ەلىنىڭ وكىلدەرى سانالاتىن 29 شاباندوز ونەر كورسەتەدى. الەمدىك پەلوتوندا ءوز ورنى بار كوماندانىڭ كوشباسشىلارى جانكۇيەرلەرگە جاقسى تانىس, جاڭادان قوسىل­عاندار دا وزدەرىن باسقا جوبالاردا جوعارى دەڭگەيدە كورسەتكەندەر. وتكەن ماۋسىمدا ءۇش رەت جەڭىس تۇعىرىنا كوتەرىلگەن جانە «تۋر دە فرانس» كوپكۇندىگىنىڭ جالپى ەسەبىندە 7-ورىن­عا يە بولعان الەكسەي لۋتسەنكو (قازاقستان), «دجيرو د’يتاليا» مەن «يسپانيا ۆۋەلتانىڭ» قولا جۇلدەگەرى ميگەل انحەل لوپەس (كولۋمبيا), گراند-تۋردىڭ ءۇش دۇركىن جەڭىمپازى («استانا» كومانداسىنىڭ قۇرامىندا ەكى رەت «دجيرو د’يتاليا» مەن ءبىر رەت «تۋر دە فرانس») ۆينچەنتسو نيبالي (يتاليا), كلاسسيكالىق ۆەلوبايگە شەبەرى, وتكەن ماۋسىمدا ەكى رەت جەڭىسكە جەتكەن جانە تارتىسقا تولى «پاريج-رۋبە» جارىسىندا 4-ورىنعا يە بولعان دجانني موسكون (يتاليا) كوماندا كوشباسشىلارىنىڭ قاتارىندا. ال 23 جاسقا دەيىنگى شاباندوزدار اراسىندا قازاقستان چەمپيونى نۇربەرگەن نۇرلىحاسىم مەن «گران پرەميو دەللا ليبەراتسيا» ءبىر كۇندىك جارىسىنىڭ جەڭىمپازى, يتاليالىق ميكەلە گادزولي جاڭا ماۋسىمدا  ونەر كورسەتپەكشى.  قازاقستاندىق كومان­دانىڭ حالىقارالىق تۋرلاردا تابىستى ونەر كورسەتۋى ءۇشىن بارلىق مۇمكىندىكتەرى بار دەپ ەسەپتەيمىن. ترانسفەرلىك كەزەڭدەگى قيىندىقتارعا قاراماستان, كوماندا كەلەر جىلعا ەرتەرەك قامداندى, ۇزدىك لەگيونەرلەرىمەن قوش ايتىسقانىمەن, بۇرىنعى كوشباسشىلارىن كەرى قايتارا الدى. سونىڭ ارقاسىندا قازاقستاندىق كلۋب جىلداعى جەتىستىكتەرىن جاڭارتۋعا, جاڭا بەلەستەردى باعىندىرۋعا ۇمتىلاتىن ۇزدىك كوماندالاردىڭ ساناتىندا قالا بەرمەك.

– Astana Qazaqstan Team كلۋبىنىڭ بولاشاعىن قالاي ەلەستەتەر ەدىڭىز?

وزدەرىڭىز بىلەتىندەي, ۆەلوكوماندا بيىلعى ماۋسىمدى جاڭا اتاۋمەن باستايدى. Astana Qazaqstan Team جوباسىنىڭ ەكىنشى تىنىسى اشىلىپ, ول جاڭا دامۋ جولىنا كوشۋگە دايىندالىپ جاتىر. نۇرلان ەركەبۇلان ۇلى باسقاراتىن قازاقستان ۆەلوسپورت فەدەراتسياسى جاڭا كوماندانىڭ دامۋىندا جانە جوسپارلارىن ىسكە اسىرۋدا ماڭىزدى رولگە يە بولعانى ءۇشىن قۋانىشتىم.  فەدەراتسيا Astana Qazaqstan Team كوماناسىنىڭ ديرەكتورلار كەڭەسىنە دە, مەنەدجمەنتىنە دە قاتىسادى. سپورتشىلار مەن ۆەلوسپورتتىڭ  جاناشىرى رەتىندە قازاقستاندىق ۆەلوكوماندانىڭ جارقىن بولاشاعى ءۇشىن قاجەتتى شەشىمدەردى دەر كەزىندە قابىلداپ, تابىستى ونەر كورسەتۋىنە, كلۋبتىڭ الدىنداعى ماقسات مىندەتتەرىن لايىقتى دارەجەدە ورىنداۋىندا ەل ۇكىمەتى زور سەنىم ارتىپ وتىر. Astana Qazaqstan Team – كوماندانىڭ جاڭا اتاۋى عانا ەمەس, بۇل جوبانىڭ جاڭارتىلعان فيلوسوفياسى. 16 جىل بويى «استانا» جوباسى ەلىمىزدىڭ الەمدىك سپورتتاعى ۆيزيتتىك كارتوچكاسى. الداعى بولاشاعى ورلەۋگە ۇلاساتىنىنا كۇمان جوق.

– كوماندا قۇرامىنىڭ 50-60 پايىزى قازاقستاندىق سپورتشىلارمەن جاساقتالۋى ءتيىس دەپ جوسپارلانىپ وتىر. كوماندانىڭ بولاشاق قۇرامىنا جالىندى جاس سپورتشىلار قالاي ىرىكتەلمەك? ولارعا قويىلاتىن تالاپتار قانداي?

الداعى ماۋسىمدا Astana Qazaqstan Team الدىنا قويىلعان ماقسات – قازاقستاندى بۇكىل الەمگە تانىتۋ, ەلدەگى ۆەلوسپورتتىڭ دامۋىنا اتسالىسۋ, جاستارعا جول اشۋ ەكەنى ءسوزسىز. قازىر كوماندادا 29 شاباندوز بار, ونىڭ 10-ى – قازاقستاندىق سپورتشى. بولاشاقتا, ەكى-ءۇش جىلدىڭ كولەمىندە ولاردىڭ قاتارىن 50-60 پايىزعا كوبەيتۋ كوزدەلدى. سپورتشىلاردىڭ, ۆەلوسپورت سالاسىندا جۇرگەن مامانداردىڭ بىلىكتىلىگىن ارتتىرۋدا كوماندا تاجىريبەسىن پايدالانۋ دا ماڭىزدى مىندەتتەردىڭ ءبىرى سانالىپ وتىر. ودان بولەك قازىر كلۋب ساپىندا باس­شىلىق پەن باپكەرلەر قۇرامىندا قازاق­ستان­دىق مامانداردىڭ ۇلەسى ارتتى. تالانتتى ءارى تاجىريبەسى تولىسقان جەرگىلىكتى سپورتشىلار دا كوماندا قاتارىنا شاقىرتىلۋدا. ءۇش بىردەي جاستار كومانداسى قۇرىلدى. ەلوردالىق كوماندا جاڭا ماۋسىمدا الدىنا ۇلكەن ماقسات قويىپ وتىر. كوماندا كوشباسشىلارىنىڭ, سونداي-اق كوماندانىڭ باسقا مۇشەلەرى قاتىساتىن جارىس كۇنتىزبەسى وقۋ-جاتتىعۋ جيىنىندا انىقتالدى. ال ءبىز ءوز كەزەگىمىزدە Astana Qazaqstan Team كاسىبي ۆەلوكومانداسى جانىنان   23 جاسقا دەيىنگى شاباندوزداردان تۇراتىن UCI قۇرلىقتىق كومانداسىن جاساقتادى. جاڭا جوباعا Astana Qazaqstan Development Team اتاۋى بەرىلگەن. جاڭا كوماندانىڭ قۇرامىندا   دارىندى جاستار توپتاستىرىلدى. ۆەلوسپورتتاعى ەلىمىزدىڭ اتىنان ونەر كورسەتىپ جۇرگەن باس كومانداعا جاستار كومانداسىندا ءساتتى ونەر كورسەتىپ جۇرگەن مىقتى ۆەلوشاباندوزدار ىرىكتەلىپ الىنادى دەپ جوسپارلانىپ وتىر.

– ال شەتەلدىك سپورتشىلار قانداي كريتەريلەر بويىنشا كومانداعا شاقىرىلادى?

ەڭ الدىمەن, كوماندانىڭ جەتىستىگىن ەسەلەيتىن تاجىريبەلى ۆەلوشاباندوزداردى قاتارعا قوسۋعا تىرىسامىز. سونداي اق, ولاردىڭ تاجريبەسى مەن شەبەرلىكتەرىن ءوز جەڭىستەرىمىزدەن عانا ەمەس, كوماندا ساپىنداعى وتاندىق سپورتشىلاردىڭ جەڭىستەرىنەن كورگىمىز كەلەدى.

– ەۋروپانىڭ جانە باسقا دا دامىعان مەملەكەتتەردىڭ دەڭگەيىمەن سالىستىرعان كەزدە, ۆەلوسپورتتىڭ دامۋىنا ۇلەس قوساتىن ينفراقۇرىلىمداردى, ۆەلوجولداردى دامىتۋعا كوڭىلىڭىز تولا ما?

وتە ورىندى, دەنە شىنىقتىرۋ مەن سالاۋاتتى ءومىر سالتىن ناسيحاتتاۋ ءۇشىن ءتيىستى ينفراقۇرىلىمدى دامىتۋدىڭ ماڭىزى زور.   ۆەلوسپورتتىڭ بەل ورتاسىندا جۇرگەن ماماندار  ءبىزدىڭ ەلىمىزدە اتالمىش سپورت تۇرىنە لايىقتى كوڭىل ءبولىنىپ, جاعداي جاسالعانىن ايتادى. ايماقتاردا ۆەلوسپورت فەدەراتسيالارى كاسىبي سپورتشىلاردى ازىرلەۋمەن قاتار, اۋەسقويلاردى دا نازاردان تىس قالدىرماي قامتىپ ءجۇر. ولاردىڭ قىزىعۋشىلاقتارىن ودان ءارى جالعاۋىنا سەرپىن بەرەدى. جىل سايىن كەزەك كەزەگىمەن ينفراقۇرىلىمداردى, ۆەلوجولداردى دامىتۋ ءىسى جۇرگىزىلىپ كەلەدى.

– Astana Qazaqstan Team-ءنىڭ ەرتەڭى جايىندا قانداي بولجام جاسايسىز? ەۋروپاداعى ەڭ مىقتى كلۋب رەتىندە كورە الاسىز با?

ەرتەڭى ب ۇلىڭعىر كوماندا ەمەس ەكەنى ءسوزسىز. قازىردىڭ وزىندە ەۋروپاداعى مىقتى كوماندالاردىڭ ءبىرى.

– ۆەلوسپورت بۇقارالىق سپورتقا اينالادى, حالىق جاپپاي ۆەلوسيپەد تەبە باستايدى دەگەنگە سەنەسىز بە?

پرەزيدەنت قاسىم-جومارت توقاەۆ ءوزىنىڭ قازاقستان حالقىنا جولداۋىندا: «حالىقتىڭ دەنساۋلىعىن جاقسارتۋ ماسەلەسى ايرىقشا نازار اۋدارۋدى تالاپ ەتەدى. بارلىق جاستاعى ەل ازاماتتارى اراسىندا بۇقارالىق سپورتتى دامىتۋ ماڭىزدىلىعىن ايتىپ ءوتتى. مەملەكەت باسشىسىنىڭ تاپسىرماسىن ورىنداۋ ءۇشىن ەلىمىزدە بۇل ءۇشىن بارلىق جاعدايلار جاسالۋدا. ماسەلەن, جىل سايىن ەلىمىزدە ونداعان سپورتتىق نىسان قولدانىسقا بەرىلەدى. بۇل كورىنىس تەك ەلىمىزدىڭ باس قالالارىندا عانا ەمەس وزگە وڭىرلەردە بايقالۋدا.

– ۋاقىت تاۋىپ, سۇحبات بەرگەنىڭىز ءۇشىن راقمەت!

«استانا» كاسىبي سپورت كلۋبىنىڭ باس سەرىكتەسى – «سامۇرىق-قازىنا» ۇاق» اق, قۇرىلتايشىسى – تۋريزم يندۋسترياسى مەن سپورتتى قولداۋ قورى

ورالباي مەرگەنباي ۇلى