ءبىلىمجاڭالىقتار
استانادا 5 بالاباقشا مەڭگەرۋشىسى سوتتالدى
فوتو: istockphoto.com
استانادا بالاباقشالاردىڭ بۇرىنعى بەس مەڭگەرۋشىسى 35 ميلليون تەڭگەدەن استام قارجى جىمقىردى دەگەن ايىپپەن سوتتالدى. ولاردىڭ سىبايلاسى دا 4 جىلعا باس بوستاندىعىنان ايىرىلدى, دەپ حابارلادى qandastar.kz استانا قالالىق پروكۋراتۋراcىنا سىلتەمە جاساپ.
مەكتەپكە دەيىنگى بەس ۇيىمنىڭ مەڭگەرۋشىلەرى جانە ولاردىڭ كومەكشىلەرى جاس بالالاردى تاماقتاندىرۋعا ارنالعان قاراجاتتى جىمقىرعانى ءۇشىن كىنالى دەپ تانىلدى.
«بۇرىنعى بالاباقشا باسشىلارى مازىرگە سايكەس قاجەتتى ازىق-ت ۇلىك كولەمىن كورسەتە وتىرىپ وتىنىمدەر بەرگەن. بۇل رەتتە الدىن الا ءونىم بەرۋشىمەن قىلمىستىق ءسوز بايلاسىپ, ولار تولىق جەتكىزىلىم تۋرالى قۇجاتتارعا جالعان مالىمەتتەر ەنگىزگەن. قىلمىستىق سحەمانىڭ باستاماشىسى جانە قىلمىستىق كەلىسىمنىڭ تىكەلەي ۇيىمداستىرۋشىسى بۇرىن سوتتالعان ولاردىڭ سىبايلاسى ء(ونىم بەرۋشى) بولعان», – دەلىنگەن حابارلامادا.
مەملەكەتتىك ايىپتاۋشى ولاردىڭ كىناسىن دالەلدەيتىن بارلىق ايعاقتاردى ۇسىنعان.
سوت ۇكىمىمەن بالاباقشا مەڭگەرۋشىلەرىنە تاعايىندالعان بارلىق مەرزىمگە پروباتسيالىق باقىلاۋ بەلگىلەنە وتىرىپ, 2 جىلدان 3 جىلعا دەيىنگى مەرزىمگە باس بوستاندىعىن شەكتەۋگە, ءماجبۇرلى ەڭبەككە تارتۋعا جانە مەملەكەتتىك قىزمەتتە قىزمەت اتقارۋعا ءومىر بويىنا تىيىم سالۋعا سوتتالدى. جەڭىلدەتەتىن ءمان-جايلار رەتىندە مەڭگەرۋشىلەردىڭ كەلتىرىلگەن زالالدى وتەگەنى, كىنالارىن تولىق مويىنداعانى جانە ولاردىڭ كىشكەنتاي بالالارىنىڭ بار ەكەندىگى تانىلدى.
ۇقساس قىلمىستار ءۇشىن وتەلمەگەن سوتتىلىعى بولعان ولاردىڭ سىبايلاسى 4 جىلعا باس بوستاندىعىنان ايىرىلدى.
جىمقىرعان 35 ملن تەڭگەدەن استام قاراجاتتىڭ بارلىعى بيۋدجەتكە قايتارىلدى.
ۇكىم زاڭدى كۇشىنە ەندى.
