استانادا 6 جاستاعى قىز اتكەنشەكتەن قۇلاپ, جاعىن سىندىرىپ العان

استانادا 6 جاسار مەدينا اۋلاداعى اتكەنشەكتەن وڭباي قۇلاپ, توسەك تارتىپ قالدى, دەپ حابارلايدى Qandastar.kz سايتى “ينفورمبيۋروعا”  سىلتەمە جاساپ.

وقيعا 4 تامىز كۇنى ەلورداداعى تۇرعىن ۇيلەردىڭ ءبىرىنىڭ اۋلاسىندا بولدى. اتكەنشەكتە تەربەلىپ وتىرعان مەدينا ابايسىزدا ۇشىپ كەتىپ, قاتتى ەكپىنمەن جەرگە قۇلادى.

“قازىر مەدينانىڭ جاعدايى ونشا ەمەس. باسى سىنعان, ماڭدايىنان ارتىنا دەيىن سىنعان. جاعى سىنعان, ءتىسى سىنعان. ۇستىڭگى تىستەرى بوساپ كەتكەن. ۇستىڭگى ەرنى جىرتىلىپ, ونى ەندى تىكتىردى. قازىر تاماق ىشە المايدى. تاڭنان كەشكە دەيىن ءدارى الىپ جاتىر”, – دەيدى قىزدىڭ اناسى اقتولقىن قاسىموۆا.

ونىڭ ايتۋىنشا, قاتتى زارداپ شەككەن قىزى قازىر ءنار تاتپايدى, تاماق ىشۋدەن قالدى. مەدينامەن بىرگە اۋرۋحانادا اكەسى دە جاتىر. الايدا بۇل — اقىلى پالاتا. اقتولقىن قاسىموۆانىڭ ايتۋىنشا, مۇنداي شىعىندى وتباسىنىڭ قالتاسى كوتەرمەيدى. ءوزى دەكرەتتىك دەمالىستا, ال ءۇيدىڭ جالعىز اسىراۋشىسى – جۇبايى.

سونداي-اق اقتولقىن قاسىموۆا مۇنداي جاعدايدىڭ ءبىرىنشى رەت ەمەس ەكەنىن اتاپ ءوتتى. سوزىنشە, ءدال وسى اتكەنشەكتەن بۇعان دەيىن دە بىرنەشە بالا قۇلاپ, ءتۇرلى جاراقات العان. ويتكەنى اتكەنشەك تىم ەسكى, ول ازداي ورتاسىنان مورت سىنعان. الايدا اتا-انالار دابىل قاققانىمەن, جاۋاپتى مەكەمەلەر ەشقانداي شارا قابىلدامادى دەپ وتىر.

“اتكەنشەكتەر مەن سىرعاناقتاردىڭ ءبارى سىنىپ تۇر. بالانىڭ قاۋىپسىزدىگى ءۇشىن توسەلەتىن جۇمساق جابىندىلار دا جوق. ەشتەڭە قاراستىرىلماعان. پاتەر يەلەرىنىڭ كووپەراتيۆىنەن ەشتەڭە جوق. م ۇلىك يەلەرىنىڭ بىرلەستىگى مۇلدەم جۇمىس ىستەمەيدى”, – دەيدى تۇرعىنداردىڭ ءبىرى گۇلدانا جانعاراشەۆا.