استانادا قانداس جاستار ماسەلەسى تالقىلاندى

بۇگىن ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىندە دايىندىق كۋرس تۇلەكتەرىنە ارنالعان ءىس-شارا ءوتتى. جيىنعا قارلىعاش بەكپاتشاقىزى (دۇنيەجۇزى قازاقتارىنىڭ قاۋىمداستىعى نۇر-سۇلتان جانە اقمولا وبلىسى فيليالىنىڭ باسشىسى), نۇرىمجان قاسىم ۇلى («وتانداستار قورى» مادەني-گۋمانيتارلىق جوبالار دەپارتامەنتىنىڭ قىزمەتكەرى), تالاپبەك تىنىسبەك («وتانداستار قورى» مادەني-گۋمانيتارلىق جوبالار دەپارتامەنتىنىڭ قىزمەتكەرى), سونداي-اق, «زەردەلى» اقىل-وي دامىتۋ ورتالىعىنىڭ قىتاي, موڭعوليا, وزبەكستاننان كەلگەن 192 تىڭداۋشىسى مەن دايىندىق كۋرس تۇلەكتەرى قاتىستى.

باس قوسۋعا مۇرىندىق بولعان – «وتانداستار قورى», دۇنيەجۇزى قازاقتارىنىڭ قاۋىمداستىعى جانە «Zerdeli» اقىل-وي دامىتۋ ورتالىعى. ولاردىڭ باستى ماقساتى – دايىندىق كۋرس تۇلەكتەرىنە الداعى ۇبت بارىسىن, گرانت ءبولىنۋ رەتىن ءتۇسىندىرۋ. بۇدان تىس, بولاشاق ستۋدەنتتەردىڭ الەۋمەتتىك جانە ازاماتتىق الۋ ماسەلەلەرىن تالقىلاۋ.
بۇگىندە شەتەلدەن كەلگەن قانداس جاستارعا ەلىمىزدە تەگىن ءبىلىم الۋ مۇمكىندىگى ارتىپ وتىر. وعان حالىقارالىق باعدارلامالار ورتالىعى مەن دۇنيەجۇزى قازاقتار قاۋىمداستىعىنىڭ ەكى جاقتى كەلىسىمى سەبەپ بولىپ وتىر.
بۇعان دەيىنگى قانداس جاستاردى مەدەتسينالىق ساقتاندىرۋ ماسەلەسى قيناپ كەلگەن. باعاسى قىمبات, پايداسى از. وقۋ ورنىنا بۇل تىعىرىقتان شىعۋدىڭ وڭتايلى ءتاسىلى ۇسىنىلدى. جانە ول وڭ شەشىمىن تاپتى. ۋنيۆەرسيتەت پەن اۋرۋحانا بىرلەسە وتىرىپ, ەتنيكالىق ستۋدەنتتىڭ پاسپورتىنداعى ۇلتى قازاق دەگەن ءمورى ارقىلى ەمدىك-ساۋىقتىرۋ, ت.ب شارالارىن تەگىن الىپ بارماق. ياعني, ەندى ولاردىڭ مەديتسينالىق كومەككە جۇگىنۋى بارلىق قازاقستان ازاماتتارىمەن بىردەي تاريفتە بولادى. بۇدان تىس, جاستاردى قر ازاماتتىعىنا قۇجات تاپسىرعاندا ەلىمىزدەگى تۇراقتى تىركەۋى بولۋى كەرەك دەگەن تالاپ قىنجىلتادى. ەندى ولار وقۋ ورنى باسشىلىعىنىڭ رۇقساتىمەن تۇراقتى تىركەۋگە تۇرا الاتىن بولدى. مىنەكي, وسىنىڭ ءبارى جان-جاقتى كەلىسىم ناتيجەسىندە جۇزەگە اسىپ وتىر.
بيىل ەلىمىزدەگى جالپى گرانتىنىڭ 4%-ى (شامامەن 1500 ورىن) ەتنيكالىق قازاقتارعا بولىنگەن. ستەپەنديالىق باعدارلاما بويىنشا باكالاۆرياتقا 25, ماگيستراتۋراعا 125, PHD دوكتورانتۋراعا 10 مەملەكەتتىك گرانتىن يەلەنۋگە بولادى.
جيىن سوڭىندا «زەردەلى» اقىل-وي دامىتۋ ورتالىعىنىڭ ماماندارى بولاشاقتا قانداي قىزمەت ءتۇرىن تاڭداۋ قاجەتتىلىگى تۋراسىندا موتەۆاتسيالىق بايانداما جاسادى. جاستار دا ءوز ويلارىن ورتاعا سالدى.
«ەلىم, جەرىم!» – دەپ كەلگەن قانداس جاستاردىڭ بۇل قادامىنا ءبىز دە قۇت جاۋسىن دەگەن تىلەكتەمىز. ەل ىرگەسى تىنىش, ۇرپاعىمىز ۇلاعاتتى بولعاي.