استانادا مەملەكەتتىك كومپانيالاردىڭ جۇمىس كەستەسى وزگەرەدى

اكىمدىكتىڭ مالىمەىنشە, تەك مەملەكەتتىك جانە كۆازيمەملەكەتتىك ۇيىمداردىڭ جۇمىس كەستەسى وزگەرەدى.

“15 قىركۇيەكتەن باستاپ ەنگىزىلەتىن جاڭا جۇمىس كەستەسى نەگىزىنەن قالانىڭ ورتالىق اۋداندارىندا ورنالاسقان مەملەكەتتىك جانە كۆازيمەملەكەتتىك ۇيىمدارعا قاتىستى. مەكتەپتەر, مەديتسينالىق مەكەمەلەر جانە حالىققا قىزمەت كورسەتۋ ورتالىقتارى سەكىلدى الەۋمەتتىك نىساندار بۇرىنعى رەجيم بويىنشا جۇمىسىن جالعاستىرادى. بۇل شارالار تاڭعى ۋاقىتتا كولىك اعىنىن بىركەلكى ەتۋگە جانە قالاداعى كولىك كوپ جۇرەتىن تاس جولدارداعى قوزعالىس تىعىزدىعىن ازايتپاق”, – دەلىنگەن اكىمدىك حابارلاماسىندا.

سونىمەن قاتار كولىكتى تىيىم سالىنعان جەرلەرگە قويۋ جانە قويۋ ەرەجەلەردى بۇزۋ دەرەكتەرىنە قاتىستى باقىلاۋ كۇشەيتىلمەك. ەرەجەنى ورەسكەل بۇزعان كولىكتەر ارنايى ايىپ تۇراعىنا قويىلادى.

الدىن الا ەسەپتەۋلەر بويىنشا, قولعا الىنعان شارالار تاڭعى جانە كەشكى ۋاقىتتا كولىك جۇكتەمەسىن 15–20 پايىزعا دەيىن تومەندەتۋگە مۇمكىندىك بەرەدى.

مامانداردىڭ ايتۋىنشا, بۇل باستاما ەكولوگيالىق جاعدايعا وڭ اسەر ەتىپ, قالالىق موبيلدىلىك ساپاسىن ارتتىرادى.

“قازىراستانانىڭ ءارتۇرلى اۋداندارىنداعى كولىك اعىمدارىنا كەشەندى تالداۋ جۇرگىزىلىپ جاتىر.تەك جۇمىس كۇنى باستالۋ ۋاقىتىن وزگەرتۋ عانا ەمەس, جەكەلەگەن ۇيىمدار ءۇشىن تۇسكى ءۇزىلىس نەمەسە جۇمىس كۇنىنىڭ اياقتالۋ ۋاقىتىن وزگەرتۋ سىندى باسقا دا شارالار قاراستىرىلىپ جاتىر”, – دەپ تولىقتىردى اكىمدىكتەگىلەر.

بۇعان دەيىن دەپۋتاتتار الماتىداعى كەپتەلىس ماسەلەسىن شەشۋ ءۇشىن قىزمەتكەرلەرگە قاشىقتان جۇمىس ىستەپ, ستۋدەنتتەرگە ساباقتى ەرتە باستاۋدى ۇسىنعانەدى.