استانادا ۇشاققا كەشىككەن ازامات ءبىر جىلعا سوتتالدى

ۇشاق رەيسىنە كەشىككەن ازامات بوستاندىعىن شەكتەۋ جازاسىنا تارتىلدى, دەپ حابارلايدى Qandastar.kz.

«سوت تالقىلاۋى بارىسىندا مەملەكەتتىك ايىپتاۋشى كۇدىكتىنىڭ كىناسىن دالەلدەيتىن بۇلتارتپاس ايعاقتار ۇسىندى. قاراۋ ناتيجەسىندە سوت ەر ادامدى كىنالى دەپ تانىپ, وعان 1 جىل 1 اي مەرزىمگە بوستاندىعىن شەكتەۋ جازاسىن تاعايىندادى. سوت ۇكىمى زاڭدى كۇشىنە ەندى», – دەپ حابارلادى كولىك پروكۋراتۋراسىنىڭ ءباسپاسوز قىزمەتى.

وقيعا استانا اۋەجايىندا ورىن العان.

«ەلوردا اۋەجايىندا الماتى تۇرعىنى رەيسكە كەشىگىپ, اگرەسسيۆتى ارەكەتكە بارىپ, اۋەجاي اۋماعىندا قوعامدىق ءتارتىپتى قامتاماسىز ەتكەن پوليتسيا قىزمەتكەرلەرىنىڭ زاڭدى تالاپتارىنا باعىنۋدان باس تارتقان. تەرگەۋ بارىسىندا ەر ادامنىڭ پوليتسيا قىزمەتكەرلەرىنىڭ تالابىن ەلەمەي قانا قويماي, ولاردى بالاعاتتاپ, دەنساۋلىعىنا زيان كەلتىرۋمەن اشىق تۇردە قورقىتقانى انىقتالدى. ونىڭ ارەكەتى بيلىك وكىلدەرىنە قارسى جاسالعان قىلمىس رەتىندە سارالاندى», – دەپ ناقتىلادى كولىك پروكۋرورلارى.