استانادا جول ۇستىندە توبەلەسكەن جۇرگىزۋشىلەر قاماۋعا الىندى

فوتو: اشىق دەرەككوز

ەلوردادا ۇساق بۇزاقىلىق جاساعانى ءۇشىن ەكى جۇرگىزۋشىگە قاتىستى ءىس قارالدى, دەپ حابارلايدى Skifnews.kz اقپارات پورتالى استانا قالاسىنىڭ اكىمشىلىك قۇقىق بۇزۋشىلىقتار جونىندەگى مامانداندىرىلعان اۋدانارالىق سوتىنا سىلتەمە جاساپ.

ءىس ماتەريالدارىنان ەكى جۇرگىزۋشى دە كولىك قۇرالدارىن باسقارعانى جانە جول ءجۇرۋ بارىسىندا جولدى بولىسە الماعاندىعى بايقالادى. سودان سوڭ ەكەۋى كولىكتەرىن توقتاتىپ, قوعامدىق ورىندا ءوزارا توبەلەس ۇيىمداستىرعان.

سوت وتىرىسى بارىسىندا ب. جانە س. جاساعان قۇقىق بۇزۋشىلىقتارىن جوققا شىعارعان جوق.

جاسالعان قۇقىق بۇزۋشىلىقتىڭ ءمان-جايى ءىس ماتەريالدارىمەن, اكىمشىلىك قۇقىق بۇزۋشىلىق تۋرالى حاتتامامەن, پوليتسيا قىزمەتكەرىنىڭ باياناتىمەن جانە وقيعا ورنىنان تۇسىرىلگەن بەينەجازبامەن راستالادى.

اقبتك 434-بابى 1-بولىگىنىڭ سانكتسياسى 20 اەك مولشەرىندە ايىپپۇل نەمەسە 5-تەن 15 تاۋلىككە دەيىنگى مەرزىمگە اكىمشىلىك قاماۋعا الۋعا اكەلىپ سوعادى.

سوت كىنانى مويىنداۋ, جاساعان ىستەرىنە وكىنۋ جانە جاس بالالارىنىڭ بولۋىن جاۋاپكەرشىلىك پەن جازانى جەڭىلدەتەتىن ءمان-جايلار رەتىندە تانىدى.

سوت قاۋلىسىمەن ەكى قۇقىق بۇزۋشى دا اقبتك 434-بابىنىڭ 1-بولىگى بويىنشا كىنالى دەپ تانىلىپ, ارقايسىسى 5 تاۋلىك مەرزىمگە اكىمشىلىك قاماۋعا الىندى.

سونداي-اق, جازالاۋ شاراسىن ايقىنداۋ كەزىندە سوت قوعامدا رەزونانس تۋدىرعان قوعامدىق ءتارتىپ پەن ادامگەرشىلىككە قول سۇعاتىن قۇقىق بۇزۋشىلىقتىڭ سيپاتىن دا نازارعا الدى.

قاۋلىلار زاڭدى كۇشىنە ەنگەن جوق.