Jańalyqtar
Astanadan Býrabaıǵa jańa týrıstik poıyz jolǵa shyqty
Foto: ashyq derekkóz
Astanadan Býrabaıǵa jańa týrıstik poıyz jolǵa shyqty, dep jazdy qandastar.kz
Búgin elordadan elimizdiń eń tanymal kýrortty aımaqtarynyń biri – Býrabaıǵa jańa týrıstik poıyz jolǵa shyqty. Jańa poıyzdyń vagondaryna elordanyń biregeı kórneki jerleri, atap aıtqanda, Báıterek, Qazaq eli monýmenti, Nur-Álem jáne basqa da nysandary beınelengen. Sondaı-aq vagondarda Visit Astana jáne Visit Aqmola óńirleriniń týrıstik brendteri ornalastyrylǵan. Vagondardyń ishki bezendirilýinen Astana qalasynyń mádenı erekshelikterin jáne Býrabaı kýrortty aımaǵynyń tabıǵı sulýlyǵyn kórýge bolady. Poıyzdyń taǵy bir ereksheligi – eksklıýzıvti aýdıo týr. Sapar barysynda jolaýshylar Astana men Býrabaıdyń tarıhy, mádenıeti men tabıǵı baılyǵy týraly qyzyqty derekterge qanyǵa alady.
«Jańa týrıstik poıyzdy iske qosý – ishki týrızmdi damytý jáne Qazaqstan boıynsha saıahattaýǵa jańa múmkindikter ashý jolyndaǵy mańyzdy qadam. Bul joba el turǵyndary men qonaqtary úshin eń ádemi kýrortty aımaqqa erkin jetýge múmkindik beredi», – dedi QR TSM Týrızm ındýstrııasy komıtetiniń tóraǵasy Nurtas Káripbaev.
Poıyz Nurly Jol (Astana) stanııasy men Býrabaı kýrorty arasynda toqtaýsyz júredi. Jol júrý ýaqyty – 2 saǵat 26 mınýt.
