Astanalyqtar ákimnen jumys kestesin bir saǵatqa keıinge shegerýin surady

Foto: ashyq derekkóz

Astana turǵyndary qala ákimi  Jeńis Qasymbekten elordalyqtardyń jumys kestesin burynǵy ýaqyt beldeýine aýystyrýdy surady. Qala basshysy astanalyqtarmen kezdesip, olardyń muń-muqtajyn tyńdady. Bul týraly qandastar.kz  aqparat agenttigi KTK arnasyna silteme jasap habarlaıdy.

Úkimettiń burynǵy ýaqyt beldeýin qaıtarmaıtynyn túsingen astanalyqtar ákimnen tym bolmasa jumys kestesin bir saǵatqa shegerýin surady.

“Burynǵy ýaqyt beldeýin keri qaıtara almaımyz. Biraq ákim retinde jumys kestesin bir saǵatqa aýystyra alasyz ba? Balalar kesh keledi, keshki 17:00-de qarańǵy túsedi. Sondyqtan jumys ýaqyty erterek bastalsa”, – dep ótinish jasady elorda turǵyndary.

Qala ákimi bul máseleni kóp bolyp aqyldasý keregin aıtty.

“Muny adamdarmen talqylaý kerek. Sizderdiń bul usynystaryńyz bireýge unamaýy múmkin. Men oǵan senimdimin. Bárine unaıtyn sheshim qabyldaý múmkin emes”, – dep jaýap berdi Jeńis Qasymbek.

Buǵan deıin ýaqyt beldeýiniń qazaqstandyqtardyń jaǵdaıyna áserin anyqtaıtyn monıtorıngtik top qurylǵany týraly jazǵan edi.