Astananyń bas ımamyna qatysty aqparat eldi dúrliktirdi

Foto: skrın

TikTok jelisinde elordanyń bas ımamynyń úıi dep túsirilgen vıdeo tarady. Degenmen din ókili bul aqparatty joqqa shyǵardy, dep jazady qandastar.kz

Ǵalamtorda taraǵan vıdeonyń avtory bastapqyda úıdi meshit dep oılaǵanyn aıtty. Kadrlarda tóbesi kúmbez pishinde jasalǵan záýlim saraıdy kórýge bolady.

«Astana qalasy bas ımamynyń úıi eken. Al endi sadaqa berińder. Ár juma saıyn salǵan sadaqalaryń qaıda ketip jatyr? Qaltaǵa ketip jatyr bári. Ne degen saraı mynaý!? Tórt áıeli jáne jeke aspazy bar eken. Senderdiń sadaqalaryńmen jalaqysyn tóleıdi. Mynanyń arǵy jaǵyn kórseń, 1 gektar jerdi qorshap alǵan», – dedi vıdeo avtory.

Alaıda Astana qalasynyń bas ımamy Erbolat Júsipov bul aqparatty joqqa shyǵardy. Muny ol dinniń aınalasynda júrgen azamattarǵa kúıe jaǵý dep atady.

«Qazir áleýmettik jelide Islam dinine jáne dinniń aınalasynda júrgen azamattarǵa kúıe jaǵý máselesi beleń aldy. Ondaı adamdar tym shekten shyqty dep aıtýǵa bolady. Eń áýeli Alla olarǵa hıdaıat bersin deımiz. Facebook, TikTok áleýmettik jelisinde belgisiz bir azamat jalǵan akkaýnt arqyly «Mynaý turǵan záýlim úı Astana qalasynyń bas ımamynyń úıi» degen mazmunda vıdeo bólisken. Bul múldem shyndyqqa janaspaıtyn ótirik aqparat ekenin qaperlerińizge salamyn», – dedi ol.

Sondaı-aq ol kópshilikti arandatýshylardyń ósek-aıańyna senbeýge shaqyrdy.

«Alla elshisi: «Senderdiń aralaryńdaǵy Alla Taǵalaǵa eń jek kórinishtileriń ósek taratyp, adamdar arasyna iritki salyp, alaýyzdyqqa aparatyndaryń», – degen. Ardaqty musylman qaýym, arandatýshylardyń ósek-aıańynan barshamyzdy saqtasyn. Men, Erbolat Júsipov Astana qalasynyń Bas ımamy retinde beıne materıalda taraǵan aqparattyń shyndyqqa janaspaıtynyn málimdeımin», – dedi ol.