جاڭالىقتار
استراحان وبلىسىنان التىن وردا حاندارىنىڭ قورىمى تابىلدى
فوتو: Zakon.kz
استراحان وبلىسىنداعى لاپاس اۋىلىنىڭ جانىندا التىن وردا حاندارىنىڭ قورىمى تابىلدى.
تاتارستان عالىمدارى 20 جىلدان بەرى ەدىلدىڭ تومەنگى اعىسىندا قازبا جۇمىستارىن جۇرگىزىپ كەلەدى.
زەرتتەۋ نىسانى استراحاننان سولتۇستىككە قاراي 100 شاقىرىم جەردە ورنالاسقان, دەپ جازادى qazaqstan.tv.
ەسكەرتكىش-قورىم اق ساراي قالاشىعى دەپ اتالاتىن ورتاعاسىرلىق قيراعان عيماراتتاردىڭ قالدىقتارىنان تۇرادى. مۇندا شامامەن جيىرماعا جۋىق كەسەنە بار.
لاپاستىڭ ءتورت ءىرى كەسەنەسىندە بەركە, وزبەك, جانىبەك, بەردىبەك حاندار جەرلەنۋى مۇمكىن.
«سوڭعى ەكى-ءۇش جىلداعى ارحەولوگيالىق زەرتتەۋلەر الەمدىك ماڭىزى بار وبەكتىنىڭ اۋقىمىن تۇسىنۋگە مۇمكىندىك بەردى. بۇل كەشەننىڭ التىن وردا حاندارىنا تىكەلەي بايلانىسى بارىن انىقتادىق. كەشەن XIV عاسىردىڭ جيىرماسىنشى جىلدارى وزبەك حان تۇسىندا سالىنعان. بۇل كەشەن جوشى ۇلىسى حاندارىنىڭ جەرلەنگەن جەرلەرىنىڭ ۇستىنە قويىلۋى دا مۇمكىن. بۇل نىسانداردى ساقتاپ, مۇراجاي قۇرۋ دا ماڭىزدى.لاپاستا ارحەولوگيالىق جۇمىستار باستالعانعا دەيىن بۇل نە ەسكەرتكىش-قورىم ەكەنىن ەشكىم انىقتاعان جوق.» ايرات سيتديكوۆ, تاتارستان عىلىم اكادەمياسى ا.ح.حاليكوۆ اتىنداعى ارحەولوگيا ينستيتۋتىنىڭ ديرەكتورى
