اتا تاريح تۋرالى ۇزىك وي

سونىڭ ءبىرى — كونە ءدىني نانىم-سەنىمدى قۇرمەتتەۋ. ونى ءبىزدىڭ ۇلى تاريحىمىز دەپ باعالاۋ. الايدا, قازىرشە يسلام ءبىزدى ول تاريحتان باس تارتۋعا, ونى جابايى ەتىپ كورسەتۋگە ارەكەتتەنۋدە.
سوندىقتان, ونى (كونە تاڭىرلىك نانىم-سەنىمدى) قورعاۋ قاجەتتىلىگى تۋىندادى.

زيالىلار ونى ءوز مىندەتىنە الۋدا.
بۇل بارلىق وركەنيەتتى ەلدەرگە ءتان قۇبىلىس.

ال, قازىرگى قازاقستاندىق يسلام يدەولوگياسى بىزدە شەت ەلدەن باسقارىلۋدا ما دەگەن كۇدىكتى سۇراققا جاۋاپ بەرىلمەي جاتىر.
سول سەبەپتى ۇلتتىق مۇددە ء«دىن مۇددەسى» كولەڭكەسىندە قالا باستادى.

ءمۇنداي «ۇلتسىزدانۋ» ءبىز ءۇشىن اسا قاۋىپتى.
ەگەر, قىتايلار سەكىلدى ءبار ملردتان اسساق — وندا ەش اڭگىمە بولماس ەدى…
ال, قازىر ۇلت بولمىسىن قىزعىشتاي قورۋ كەرەك.

ول كونە سالت-داستۇردەن تۇرادى. ال ونىڭ كوبى قازىرگى يسلام كانوندارىمەن سايكەس كەلە بەرمەيتىنىن — ءدىن وكىلدەرى وزدەرى مويىندايدى.
ەندەشە, ءدىن ونداي ۇلتتىق ءداستۇردى قارالاماۋى كەرەك, حالىقتىڭ دۇنيەتانىمىنا قارسى شىقپاۋى كەرەك.

بىراق ءدىني فۋندامەنتاليزم وعان بەيىمدەلەتىن ەمەس ازىرگە…
اراب الەمى مەن مادەنيەتىن سو قالپى, وزگەرتۋسىز, كوبىنە ورتا عاسىرلىق قالىپتا تىقپالاۋمەن ءجۇر.

ونى حالىق مويىنداعىسى كەلمەيدى- زامان مەن عىلىم-ءبىلىم العا كەتىپ قالدى.
ايتىس وسى توڭىرەكتە جۇرۋدە.

جالپى, ءدىن ءوزىنىڭ ىشكى ماسەلەلەرىن تالقىلاۋدى قوعام ساناسىنان تىس جۇرگىزۋى كەرەك. وعان ورىن جەتكىلىكتى.

حالىقتى ءوز بولمىسىمەن, ءوز ءداستۇرى مەن مادەنيەتىمەن وزىنە قالدىرعان جاقسى.

سوندا عانا ۋنيتارلى مەملەكەت بولامىز.

بولماسا, كەلەر ۇرپاق «اراب-مۇسىلمان كونفەدەراتسياسىنا ەنۋىمىز كەرەك» دەپ, تاۋەلسىزدىكتەن ءوز ەركىمەن باس تارتۋى دا مۇمكىن…

ءا.باكىر ۇلى