Ataýly áleýmettik kómek alýǵa qoıylatyn talaptar jarııalandy

Foto: ashyq derekkóz

2024 jylǵy 1 qazanǵa 73,4 myń otbasyndaǵy 389,1 myń adamǵa ataýly áleýmettik kómek (budan ári – AÁK) taǵaıyndaldy, – dep habarlaıdy qandastar.kz  Aikyn.kz-ke silteme jasap.

Bıyl osy maqsatqa bıýdjetten 55,9 mlrd teńge qarastyrylǵan.

Buryn habarlanǵandaı, AÁK-niń negizgi maqsaty – aqshalaı tólem túrinde qoldaýdy júzege asyrý jáne otbasynyń eńbekke qabiletti múshelerin jumyspen qamtýǵa járdemdesýdiń belsendi sharalaryna tartý arqyly otbasyn qıyn ómirdegi jaǵdaıdan shyǵarý.

AÁK mynalardy kózdeıdi:

– tabysy óńirlik eń tómen kúnkóris deńgeıiniń 70%-nan aspaıtyn azamattarǵa toqsan saıyn áleýmettik kómek taǵaıyndaý;

– tabysy az otbasylardaǵy 1 jas pen 6 jas aralyǵyndaǵy ár balaǵa 1,5 AEK (5 538 teńge) mólsherinde aı saıynǵy qosymsha tólem berý. 2024 jylǵy 1 qazanǵa AÁK alýshylar qatarynan mektep jasyna deıingi 120,4 myń balaǵa 4,2 mlrd teńge somasyna qosymsha tólem taǵaıyndaldy;

– jumysqa ornalastyrý, óz isin ashýǵa nıetti otbasylarǵa granttar berý, biliktilikti arttyrý kýrstaryna jiberý (qajetine qaraı) jáne basqalar arqyly jumyspen qamtýǵa járdemdesý.

Qazirgi ýaqytta qazaqstandyqtar AÁK taǵaıyndaýǵa ótinishti turǵylyqty jeri boıynsha mansap ortalyǵyna, aýyl okrýginiń ákimine júginý nemese Elektrondyq úkimet portaly (egov.kz) arqyly bere alady.