«اتى قىمىز, زاتى اراق»: نۇرالى «ۇستاز» قازاقتىڭ بال قىمىزىنان باس تارتۋدى ۇسىندى

فوتو: اشىق دەرەككوز

مولدالار مەن يمامدار قازاقتىڭ ادەت-عۇرپىنا سوقتىقپاسا جۇرە المايدى. ولار اپتا سايىن ءبىر جاڭالىق شىعارىپ, ەل ءىشىن الاتايداي بۇلدىرەدى دە جۇرەدى. بۇل جولى نۇرالى اتتى ۇستاز قازاقتىڭ بال قىمىزىنا شۇيلىگىپ, ايدى اسپانعا بىراق شىعاردى. جاماعاتقا ۋاعىز ايتىپ وتىرعان يمام-مولدانىڭ قازاقتىڭ بال قىمىزىنا قاتىستى ايتقان ءپاتۋاسى الەۋمەتتىك جەلىگە تاراپ كەتتى, دەپ حابارلايدى qandastar.kz Qazaq.today اگەنتتىگىنە سىلتەمە جاساپ.

جاماعاتقا ۋاعىز ايتىپ وتىرعان الگى ۇستاز, قىمىز ماس قىلسا, قولىڭدى توبەگە قويىپ قاشىپ كەتۋ كەرەك دەيدى.

«سول بال قىزمىزدى ءىشىپ وتىرعان جىگىتتەر ماعان «زۆانداپ» جاتىر. «ۇستاز مىنا بال قىمىز جايلى نە ايتاسىز?», – دەيدى. مەن بىلمەيمىن, بال قىمىزدى ءوزىم بىرىنشىدەن كورگەن جوقپىن. سويتسەم, «ۇستاز, قازىر مىنانى ءىشىپ وترقتا, ءبىر-بىرىمىزگە اڭگىمە ايتىپ وترق» دەيت تا الگى جىگىتتەر. كادىمگى ماس بولىپ وتىرعانىن ايتىپ وتىردا. قۇتتى بولسىن دەدىم, مەن ايتتىم. وندايعا جولاماعانىڭ دۇرىستا, اللاھ سۇبحاناللا. قىمىزدىڭ ءوزىن اشىتساڭىز پروبلەما جوق. ەگەر ماس قىلاتىن بولسا ونداي قىمىزدان, ەكى قولىڭدى توبەگە قويىپ, قاشىپ كەتۋ كەرەك قوي. ءىشىپ الىپ, اتى قىمىز, زاتى اراق بولىپ جاتسا ول بولمايدى», – دەدى نۇرالى ۇستاز اتالىپ كەتكەن مولدا.

بابالار ىشكەن بال قىمىزدىڭ قادىر-قاسيەتىن بىلمەيتىن ۋاعىزشىل ۇستازدىڭ اقىل-كەڭەسى تاعىدا سىنعا ۇشىرادى. «ۇيىرىلگەن سارى التىنداي سارى قىمىز, اۋرۋعا – ەم, ساۋعا – قۋات, ءدارى قىمىز. ەلىمنىڭ باياعىداي سۇيگەن اسى, شىعارشى تاعى نەڭ بار كارى قىمىز», – دەپ جامبىل جاباەۆتار جىرلاعان قىمىز قىرىق دەرتكە ەم. ال, الگى مولدا كورمەگەن, بىلمەگەن, بەزىپ كەتۋ كەرەك دەگەن بال قىمىزدى قازاقتار بال, قانت, ورىك-مەيىز قوسىپ تا پىسىرگەن. بال قىمىزدى كوبىنە سىرقات ادامعا, بالالارعا, سونداي-اق, جاس بوسانعان ايەلدەرگە بەرگەن.