اۋعانستان-قازاقستان-ەۋروپا. ەسىرتكى ارناسى انىقتالدى

ۇلتتىق قاۋىپسىزدىك كوميتەتى وتكەن جىلدىڭ سوڭىندا «سولتۇستىك باعدار» دەپ اتالاتىن حالىقارالىق ەسىرتكى جەتكىزۋ ارناسىنىڭ جولىن كەسۋ بويىنشا وپەراتسيانى ىسكە اسىردى. جەدەل جەتە تەكسەرۋ بارىسىندا اۋعانستاننان قازاقستان اۋماعى ارقىلى ەۋروپا ەلدەرىنە ەسىرتكى كونترابانداسىنىڭ قولدانىستاعى ارناسى انىقتالدى.

كوميتەت شەتەلدىك سەرىكتەستەرمەن جانە گەرمانيانىڭ قۇزىرەتتى ورگاندارىمەن ءوزارا ءىس-قيمىل جاساي وتىرىپ, حالىقارالىق ەسىرتكى سينديكاتتارىنىڭ ءبىرىنىڭ دامىعان جەلىسىن انىقتادى. جەتە تەكسەرۋدىڭ سوڭعى كەزەڭى گەرمانيادا 60 كگ اپيىن مەن 12 كگ مەتامفەتاميندى تاسىمالداۋ كەزىندە ەكى شەتەلدىكتى ۇستاۋ بولدى. گەرمانيانىڭ قۇقىق قورعاۋ ورگاندارى سوتقا دەيىنگى تەرگەۋ جۇرگىزۋدە. اعىمداعى جىلدىڭ اقپانىندا باسقا جەتە تەكسەرۋ شەڭبەرىندە ترانسۇلتتىق ەسىرتكى قۇرىلىمىنا قاتىسۋشىلاردىڭ اۋعان ەسىرتكىلەرى كونترابانداسىنىڭ كەزەكتى حالىقارالىق ارناسىن ۇيىمداستىرۋ نيەتتەرى اشكەرەلەندى.

ەسىرتكى تىزبەگىنىڭ بارلىق بۋىندارىن جويۋ ماقساتىندا قازاقستان رەسپۋبليكاسى باس پروكۋراتۋراسىنىڭ ۇيلەستىرۋىمەن ەۋروپالىق سەرىكتەستەرمەن ءوزارا ءىس-قيمىل ۇيىمداستىرىلدى. قابىلدانعان شارالاردىڭ ناتيجەسىندە ەسىرتكى ارناسىنىڭ نەگىزگى ۇيىمداستىرۋشىسى – يسپانيا ازاماتى ۇستالدى, ودان قازاقستان ارقىلى اۋعانستاننان ەۋروپاعا جەتكىزىلگەن 10 كگ مەتامفەتامين الىندى. ەۋروپادا الىنعان ەسىرتكىنىڭ نارىقتىق قۇنى 2.5 ملن دوللاردان ارتىققا باعالانىپ وتىر. ەسىرتكى ترافيگىنىڭ حالىقارالىق ارنالارىن بەيتاراپتاندىرۋ جونىندەگى ءىس-شارالار جالعاسۋدا.