اۋىلدارداعى مەديتسينالىق نىسانداردىڭ قۇرىلىسى باياۋ ءجۇرىپ جاتىر

اۋىلدىق جەرلەردە مەديتسينالىق نىسانداردىڭ قۇرىلىسى تىم باياۋ ءجۇرىپ جاتىر.

ۇكىمەت باسشىسى جاۋاپتى مينيسترلىك پەن جەر ۋچاسكەلەرىن ۋاقىتىلى بولمەي وتىرعان جەرگىلىكتى اكىمدىكتەردىڭ جۇمىسىن سىنعا الدى.

«اۋىلداعى دەنساۋلىق ساقتاۋدى جاڭعىرتۋ» ۇلتتىق جوباسى شەڭبەرىندە بىلتىر 309 ەمدەۋ مەكەمەسى تاپسىرىلۋى ءتيىس ەدى. الايدا ءاۋ باستاعى جوسپار ىسكە اسپاي, 99 نىسانعا دەيىن قىسقارىپ قالدى.

ونىڭ وزىندە 7 مەكەمەنىڭ قۇرىلىسى ءالى كۇنگە دەيىن اياقتالماعان.

اۋىلداعى اعايىن ءۇشىن سالىنىپ جاتقان نىسانداردىڭ قۇرىلىس جۇمىستارى باياۋ ءجۇرىپ جاتىر. اكىمدىكتەر جەر تەلىمىن ۋاقىتىلى بەرمەيدى.

ول ءۇشىن ءتۇرلى سىلتاۋ ايتادى. ۇكىمەت وتىرىسىندا پرەمەر-مينيستر ۇلتتىق جوبا اياسىندا جۇزەگە اسۋى ءتيىس جۇمىستاردىڭ قارقىنىن ەداۋىر جەدەلدەتۋدى تاپسىردى. ءار نىساننىڭ قۇرىلىسى ناقتى مەرزىمدە اياقتالىپ, پايدالانۋعا بەرىلۋى قاجەت. ولجاس بەكتەنوۆ, قر پرەمەر-ءمينيسترى: – بىلتىر اكىمدەر تيپتىك جوبالاردى جەرگىلىكتى جەرگە بايلانىستىرۋ ءتيىس ەدى. ول جۇمىس تا اياقسىز قالدى. قازىرگى تاڭدا 239 وبەكتىنىڭ جوبالىق قۇجاتتاماسى دايىن. 109 بويىنشا عانا مەردىگەر كومپانيالار ايقىندىلدى. قالعاندارى ناقتى ىستەن گورى جالاڭ ءسوز كۇيىندە قالىپ وتىر.

ال قۇرىلىس جۇمىستارىن الداعى ناۋرىز-ءساۋىر ايلارىندا باستاۋ قاجەت. وتىرىستا سالاداعى مامان تاپشىلىعى دا ءسوز بولدى. جاۋاپتى ۆەدومستۆو باسشىسى قوردالانعان ماسەلەنى شەشۋ جولدارىمەن ءبولىستى.

ايتۋىنشا, بيىلدان باستاپ اۋداندىق اۋرۋحانالارعا 500-گە جۋىق دارىگەر مەن 300-دەن اسا جاس مامان بارادى. ولارعا الەۋمەتتىك قولداۋ كورسەتىلەدى. بۇل ءوڭىر قاراجاتى ەسەبىنەن جۇزەگە اسىرىلادى. جالپى مىڭنان اسا بىلىكتى كادردى دايارلاپ, قاتارعا قوسۋ كوزدەلىپ وتىر. اقمارال ءالنازاروۆا, قر دەنساۋلىق ساقتاۋ ءمينيسترى: – ۇلتتىق جوبانىڭ ءبىرىنشى مىندەتى شەڭبەرىندە بارلىعى 655 مساك سالۋ جوسپارلانىپ وتىر. ونىڭ ىشىندە 92 مساك قۇرىلىسى اياقتالدى. جەتەۋىنىڭ جوبا مەرزىمدەرى بۇزىلىپ, بيىلعى جىلى اياقتالادى دەپ كۇتىلىپ وتىر. حالىققا ساپالى مەديتسينالىق قىزمەت كورسەتىپ, جاعداي جاساۋ ءۇشىن زاماناۋي نىساندار ءالى دە بوي كوتەرەدى. مىسالى, ەلوردانىڭ وزىندە 2 پەريناتالدىق ورتالىق سالىنادى. جەڭىس قاسىمبەك, استانا قالاسىنىڭ اكىمى: – ستاتيستيكاعا سايكەس قالالىق ستاتسيونارلارداعى ورىنداردىڭ 17%-تەن استامىن باسقا وڭىرلەردەن كەلگەن ناۋقاستار پايدالانىپ جاتىر. ءبىز قوسىمشا دەنساۋلىق ساقتاۋ نىساندارىنا قاجەتتىلىك بار ەكەنىن كورىپ وتىرمىز.

سوندىقتان ءۇشىنشى كوپسالالى اۋرۋحانا مەن ەكى پەريناتالدىق ورتالىقتى سالۋ ماسەلەسى وزەكتى بولىپ تۇر.

دەموگرافيالىق ءوسىمدى ارتتىرىپ, انا مەن بالا دەنساۋلىعىن قورعاۋعا قاشاندا باسىمدىق بەرىلەدى. بۇل باعىتتا باس قالادا وسى جىلى ەكى پەريناتالدىق ورتالىقتىڭ قۇرىلىسى باستالادى. كوپبەيىندى اۋرۋحانا بويىنشا جوبالاۋ جۇمىستارى دا بيىل اياقتالۋى ءتيىس. قۇرىلىسى الداعى جىلى باستالادى.