اياق-قولى جوق قازاقستاندىقتى 10 جىل بويى ايالدامادا قايىر سۇراۋعا ماجبۇرلەگەن

فوتو: جي

قاراعاندىدا قول-اياعى جوق ەر ادام 10 جىلدان استام ۋاقىت ەڭبەك قۇلدىعىندا بولعان. ەر ادامدى ۇرىپ-سوعىپ, قايىر سۇراۋعا ماجبۇرلەگەن. ءتىپتى كىشكەنتاي قىزىمەن بوپسالعان.  بۇل تۋرالى qandastar.kz Stan.kz اقپارات اگەنتتىگىنە سىلتەمە جاساپ حابارلايدى.

وتكەن جىلدىڭ مامىر ايىندا ىشكى ىستەر مينيسترلىگى قاراعاندىدا مۇگەدەكتىگى بار ەر ادامعا كۇشتەپ قايىر سۇراۋعا ماجبۇرلەگەن قىلمىستىق توپ انىقتاعان ەدى. تەرگەۋ مالىمەتتەرى بويىنشا, قىلمىسكەرلەر ءوز قۇرباندارى ارقىلى جىلىنا 10 ميلليون تەڭگەگە دەيىن تابىس تاۋىپ وتىرعان.

41 جاستاعى ەر ادام ەڭبەك قۇلدىعىنا ازاماتتىق نەكەدەگى جۇبايىمەن بىرگە بولعان. ايەلى «قوجايىننىڭ» ايتۋىمەن كۇيەۋىن قالا ورتالىعىنداعى ايالداماعا اپارادى. ال ەرادام كۇنى بويى سول جەردە وتىرىپ, وتكەن-كەتكەن ادامداردان قايىر سۇراعان. مۇگەدەكتىگى بار ەر ادام وسىلايشا كۇنىنە 20-40 مىڭ تەڭگەگە دەيىن تابىس اكەلگەن.

“قىلمىستىق ءىس ماتەريالدارىنا سايكەس, قىلمىسكەرلەر جابىرلەنۋشىنى قورقىتىپ, ۇرىپ-سوعىپ كۇن سايىن تاڭعى 08:00-دەن كەشكى 18:00-گە دەيىن قايىر سۇراۋعا ماجبۇرلەگەن. ەر ادام جاڭبىر, اپتاپ ىستىققا قاراماستان ول جىل بويى قاراعاندىداعى «45-ءشى كۆارتال» ايالداماسىندا جەردە وتىرىپ ادامداردان قايىر سۇراعان. ال جينالعان اقشانى «قوجايىن» ءوز قالۋىنشا جۇمساعان”, – دەلىنگەن قۇجاتتا.

تەرگەۋ مالىمەتتەرىش, قاسكويلەر مۇگەدەكتىگى بار ەر ادامدى ۇرىپ-سوعىپ قانا قويماي, ىشىمدىككە ۇيرەتكەن. 2020 جىلدان باستاپ ونىڭ ازاماتتىق نەكەدەگى ايەلىنەن تۋعان ءسابيدى دە بوپسالاۋعا پايدالانعان. قىلمىستىق ارەكەتتى ۇيىمداستىرۋشى جاڭا تۋعان ءسابيدى تارتىپ الىپ, ءوز تۋعان قارىنداسىنا تاربيەلەۋگە بەرگەن. ءبۇلدىرشىن سول ۇيدە 4 جاسقا دەيىن وسكەن.

“2020 جىلدىڭ قاراشاسىندا جابىرلەنۋشىلەردىڭ قىزى دۇنيەگە كەلگەن. “قوجايىنى” بۇل بالانى دا ءوز قارىنداسىنا بەگەن. قىلمىستىق ىستەن حابارى جوق ايەل ءسابيدى ءوز قامقورلىعىنا العان. جابىرلەنۋشىلەر تەك «قوجايىننىڭ» رۇقساتىمەن عانا بالاسىن بەلگىلى ءبىر ۋاقىتتا كورە الاتىن بولعان. ەگەر ولاردىڭ تالاپتى ورىنداۋدان باس تارتسا, ولاردى اتا-انا قۇقىعىنان ايىراتىنىن ايتىپ قورقىتقان”, – دەلىنگەن ءىس ماتەريالدارىندا.

قىلمىستىق ءىس ماتەريالدارىنا سايكەس, 2023 جىلدىڭ جەلتوقسان ايىندا كۇدىكتى ەسىرتكىگە قاتىستى ءىس بويىنشا ۇستالعان. سول كەزدە ونىڭ مۇگەدەك ەر ادامدى قايىر سۇراۋعا قالاي ماجبۇرلەگەنى تۋرالى دەرەكتەر اشكەرە بولدى.

اتالعان ءىس بويىنشا بىرنەشە ادام كۇدىككە ءىلىندى. سوتتالۋشىلار كىنالارىن مويىندامادى. ۇشەۋى جابىرلەنۋشىلەردى قۇلدىقتا ۇستاۋعا قاتىسپاعاندارىن, تەك قىلمىستىق ءىستىڭ باستى قاتىسۋشىسىنىڭ كەيبىر ۇساق تاپسىرمالارىن ورىنداعاندارىن العا تارتتى. ايتۋىنشا, ول وزدەرىنىڭ قىلمىس جاساپ جاتقاندارىن بىلمەگەن.

جابىرلەنۋشىلەر سوت وتىرىستارىنا قاتىسپايدى. ويتكەنى دەنساۋلىعىنا بايلانىستى سوتقا كەلە المايدى. قازىر ولار قوعامدىق قوردىڭ قامقورلىعىندا. بۇل ۇيىم ولارعا جەكە كۋالىك الىپ بەرۋگە كومەكتەسىپ, زاڭگەرلىك, پسيحولوگيالىق جانە مەديتسينالىق كومەك كورسەتكەن. سونداي-اق گۋمانيتارلىق جاردەم بەردى. سوت پروتسەسى جالعاسىپ جاتىر