باعاناشىلداعى بالالار ءۇيىنىڭ تاربيەلەنۋشىلەرى بەينەۇندەۋ جاريالادى

فوتو: ۆيدەودان كادر

الماتىداعى №1 وبلىستىق بالالار ءۇيىنىڭ تاربيەلەنۋشىلەرى قوناەۆ قالاسىنا كوشۋگە قارسى ەكەنىن ءبىلدىرىپ, بەينەۇندەۋ جاريالادى,— دەپ حابارلايدى qandastar.kz  Dalanews.kz-كە سىلتەمە جاساپ.

ولاردىڭ ايتۋىنشا, بۇعان دەيىن الماتى وبلىسىنىڭ اكىمى مارات سۇلتانعازيەۆپەن, ءبىلىم باسقارماسىنىڭ وكىلدەرىمەن جانە بالا قۇقىقتارى جونىندەگى ۋاكىل دينارا زاكيەۆامەن كەزدەسۋ وتكەن. سول كەزدە شەنەۋنىكتەر مەكەمەنىڭ كوشىرىلمەيتىنىنە ۋادە بەرگەن.

«بالالار ءۇيى سول ورنىندا قالادى دەگەن بولاتىن. بىراق ءۇش اي ءوتتى, تاعى دا كوشىرۋ تۋرالى اڭگىمە باستالىپ كەتتى. ءتىپتى بالالار ءۇيىن قوناەۆقا كوشىرۋ تۋرالى بۇيرىق شىققانىن كوردىك. نەلىكتەن? بۇل قانداي شەشىم? شەنەۋنىكتەر, اكىمدەر, جاۋاپتى تۇلعالار, بالالاردى جايىنا قالدىرىڭىزدار», – دەدى تاربيەلەنۋشىلەر ءوز ۇندەۋىندە.

سونىمەن قاتار ولار قوناەۆ قالاسىنداعى جاڭا عيماراتتىڭ ماڭىندا ساپالى مەديتسينالىق مەكەمەلەردىڭ جوق ەكەنىن ايتىپ, الاڭداۋشىلىق ءبىلدىردى.

ء«بىز بۇكىل بالالار ءۇيىنىڭ اتىنان زاماناۋي, وتباسىلىق ۇلگىدەگى مەكەمە سۇرايمىز. ءبىز باي ادامدار سياقتى كوپ نارسە تالاپ ەتىپ وتىرعان جوقپىز», – دەلىنگەن ۇندەۋدە.

ايتا كەتەيىك, الماتىداعى بوستاندىق اۋدانىنداعى باعاناشىل شاعىناۋدانىندا ورنالاسقان №1 وبلىستىق بالالار ۇيىنە قاتىستى تاعى دا داۋ شىقتى. بيىل ناۋرىزدا وسى مەكەمەنىڭ تاربيەلەنۋشىلەرى وزدەرىن الماتىدان قوناەۆ قالاسىنا كوشىرمەك بولعان بيلىكتىڭ شەشىمىنە قارسىلىق تانىتقان ەدى. قوعام بەلسەندىلەرى بولسا, «اكىمدىك بالالار ءۇيى ورنالاسقان باعالى جەر تەلىمىن قۇرىلىس كومپانيالارىنىڭ بىرىنە بەرىپ, ونىڭ ورنىنا تۇرعىن ءۇي كەشەنىن سالعىسى كەلەدى» دەپ دابىل قاققان بولاتىن.

جاعداي قوعامدىق نارازىلىققا ۇلاسقان سوڭ الماتى وبلىسىنىڭ اكىمى مارات سۇلتانعازيەۆ ارنايى مالىمدەمە جاساپ, «الماتىدا وقىپ جاتقان بالالاردىڭ ورنىنان قوزعالمايتىنىن, سەبەبى بۇل ولاردىڭ بەيىمدەلۋى مەن قوعامعا ارالاسۋىنا كەرى اسەر ەتەتىنىن» ايتقان.

ونىڭ سوزىنشە, بالالاردىڭ وزدەرى دە الماتىدان كەتكىسى كەلمەيتىنىن جەتكىزگەن. اكىمدىك ءتىپتى بۇل شەشىمدى قابىلداۋ كەزىندە تاربيەلەنۋشىلەردىڭ پىكىرىن باستى نازارعا العانىن باسا ايتقان ەدى. وسىلايشا وبلىس اكىمدىگى باستاپقى ۇستانىمىنان شەگىنىپ, بالالار ءۇيى بۇرىنعى ورنىندا قالادى, ال قوناەۆ قالاسىندا تەك جاڭادان  بالالاردى قابىلدايتىن ورتالىق اشىلادى دەگەن مالىمدەمە جاساعان.

الايدا ءۇش اي وتپەي جاتىپ, دەپۋتات باقىتجان بازاربەك الەۋمەتتىك جەلىدە توسىن قۇجات جاريالادى. 2025 جىلى 10 شىلدەدى الماتى وبلىسىنىڭ ءبىلىم باسقارماسى «ارنايى الەۋمەتتىك قىزمەتتەرگە مۇقتاج بالالاردى قولداۋ جونىندەگى وبلىستىق ورتالىقتىڭ مەكەنجايىن وزگەرتۋ تۋرالى» بۇيرىق شىعارعان ەكەن. ياعني بالالار ءۇيىنىڭ بۇرىنعى ورنىنان قوناەۆقا كوشۋ ماسەلەسى قايتادان كۇن تارتىبىنە شىققان.