جاڭالىقتار
باعدارلامادا گولوۆكيننىڭ جالاقىسى تۋرالى سۇراق قويعان جۋرناليست سوتقا تارتىلماق
كوللاج: Dalanews.kz
YouTube-ارناسىنداعى «ۋاقىت كورسەتەدى» باعدارلامادا ۇلتتىق وليمپيادا كوميتەتىنىڭ باسشىسى گەننادي گولوۆكيننىڭ جالاقىسى تۋرالى سۇراق قويعان جۋرناليست نۇرسەيىت جىلقىشىباي سوتقا تارتىلماق. بۇل تۋرالى ءجۋرناليستىڭ ءوزى ايتتى, – دەپ حابارلايدى Dalanews.kz.
ءجۋرناليستىڭ سوزىنشە. ول بەلگىسىز نومىردەن حات العان.
«سكريندى سالماي-اق قويايىن. حات اۆتورى ءوزىن ۇلتتىق وليمپيادا كوميتەتىنىڭ قۇقىقتىق قامتاماسىز ەتۋ قىزمەتىنىڭ باسشىسىمىن دەپ تانىستىرادى. ول كىسىنىڭ اتى-ءجونى جوق پا? بۇنداي حات ءمور مەن قول قويىلىپ جىبەرمەۋشى مە ەدى? الدە اتى دارداي ۇلكەن كوميتەتتىڭ جۋرناليستەرمەن كوممۋنيكاتسياسىنىڭ دەڭگەيى وسى ما? بالكىم مەنىكى تەرىس. مۇمكىن ۇلتتىق وليمپيادالىق كوميتەتتىڭ اتىن جامىلعان كوشەدە جۇرگەن بىرەۋلەر شىعار. شىن كوميتەتتىڭ ادامى بولسا اتىن ايتىپ ادام سياقتى حابارلاسىپ رەسمي قاعاز جىبەرۋى ءتيىس قوي.
ماسەلە مىنادا وليمپيادا چەمپيونى, ۆەل باركەر كۋبوگىنىڭ يەگەرى باقتيار ارتاەۆ كوميتەت باسشىسى گ. گولوۆكين 20 ملن اسا ايلىق الاتىنى راس پا دەگەن سۇراق قويدىم. باقتيار «ول جاعىن ناقتى بىلمەيمىن. بىراق ەستۋىم بار وسى اڭگىمەنى» دەيدى.
2004 جىلعى وليمپيادا چەمپيونى باقتيار ارتاەۆ «ۋاقىت كورسەتەدى» YouTube-ارناسىنا بەرگەن سۇحباتىندا ۇلتتىق وليمپيادا كوميتەتىنىڭ پرەزيدەنتى گەننادي گولوۆكيننىڭ جالاقىسى تۋرالى ايتتى.
ناقتى بىلمەيمىن, بىراق گولوۆكيننىڭ ۇوك-دەگى جالاقىسى – 20-25 ميلليون تەڭگە شاماسىندا, – دەدى ارتاەۆ سۇحباتتا.
كەيىننەن قازاقستان رەسپۋبليكاسى ۇوك بۇل اقپاراتتىڭ شىندىققا جاناسپايتىنىن رەسمي تۇردە مالىمدەدى.
گەننادي گولوۆكين پرەزيدەنتتىك قىزمەتتى ەرىكتى نەگىزىندە اتقارادى. ونىڭ قىزمەتىنە اقشا تولەنبەيدى. ونىڭ موتيۆاتسياسىنىڭ قاراجاتقا دا, ساياسي مانساپقا دا قاتىسى جوق. ەڭ الدىمەن ونىڭ جۇمىسى قازاقستاندىق سپورتقا قولداۋ كورسەتۋگە, سونداي-اق, قازاقستان ۇوك-ءتىڭ حالىقارالىق سپورتتىق قوعامداستىق الدىنداعى بەدەلىن نىعايتۋعا باعىتتالعان, – دەگەن مالىمدەمەدە.
ءوز قىزمەتىنە كىرىسكەن بويدا گەننادي گولوۆكين ۇوك-ءتىڭ مەملەكەتتىك بيۋدجەت اقشاسىنا ۇمىتتەنبەيتىنىن اشىق ايتقان. ۇيىمنىڭ قىزمەتى گ. گولوۆكيننىڭ قاتىسۋىمەن تارتىلعان دەمەۋشىلەر قاراجاتى ەسەبىنەن جۇزەگە اساتىنىن دا حابارلادى.
جالعان اقپارات تاراتۋشىلار قر زاڭىنا سايكەس جاۋاپقا تارتىلاتىنىن, ناقتىلاپ ايتار بولساق, قر قك 274 بابىنا ساي قىلمىستىق جاۋاپكەرشىلىككە تارتىلاتىنىن ەسكەرتە كەتكەن.
