بالا كۇتىمىنە بەرىلەتىن جاردەماقى ارتتى

1 قاڭتاردان باستاپ انالارعا بالا كۇتىمىنە بايلانىستى بەرىلەتىن جاردەماقى مولشەرى وسەدى, دەپ جازدى qandastar.kz

«بالالى وتباسىلارعا بەرىلەتىن مەملەكەتتىك جاردەماقىلار تۋرالى» قر زاڭىنا سايكەس, جۇمىس ىستەمەيتىن ايەلدەر ءۇشىن بالا 1,5 جاسقا تولعانعا دەيىن ونىڭ كۇتىمىنە بايلانىستى اي سايىنعى مەملەكەتتىك جاردەماقىنىڭ مولشەرى مىناداي مولشەرلەردە بەلگىلەنگەن:

1-ءشى بالاعا — 5,76 ايلىق ەسەپتىك كورسەتكىش;

2-ءشى بالاعا — 6,81 ايلىق ەسەپتىك كورسەتكىش;

3-ءشى بالاعا — 7,85 ايلىق ەسەپتىك كورسەتكىش;

4-ءشى جانە ودان كەيىنگى بالاعا 8,9 ايلىق ەسەپتىك كورسەتكىش مولشەرىندە.

1 قاڭتاردان باستاپ ەلىمىزدە ايلىق ەسەپتىك كورسەتكىش (اەك) 3692 تەڭگەدەن 3932 تەڭگەگە دەيىن كوبەيتىلدى. سوعان ساي, 2025 جىلعى تولەم بىلاي بەلگىلەندى:

1-ءشى بالاعا — 22 649 تەڭگە (2024 جىلى — 21 266 تەڭگە);

2-ءشى بالاعا — 26 777 تەڭگە (2024 جىلى — 25 143 تەڭگە);

3-ءشى بالاعا — 30 867 تەڭگە (2024 جىلى — 28 982 تەڭگە);

4-ءشى جانە ودان كەيىنگى نارەستەلەر ءۇشىن — 34 995 تەڭگە (2024 جىلى — 32 859 تەڭگە).

ودان بولەك بوسانعان اناعا بەرىلەتىن ءبىر رەتتىك جاردەماقى — ءسۇيىنشىپۇل بار. بيىل ءبىرىنشى, ەكىنشى جانە ءۇشىنشى بالاعا 149 416 تەڭگە (38 اەك), ءتورتىنشى جانە ودان كەيىنگى بالالارعا 247 716 تەڭگە (63 اەك) ءسۇيىنشىپۇل تولەنەدى.

دەكرەتكە شىققانعا دەيىن جۇمىس ىستەگەن ايەلدەر ءۇشىن بىرجولعى الەۋمەتتىك تولەم مولشەرى سوڭعى 12 ايداعى ورتاشا ايلىق تابىسىنا بايلانىستى ەسەپتەلەدى. ورتاشا ايلىق تابىستى ەڭبەككە جارامسىزدىق كۇندەرى سانىنىڭ ءتيىستى كوەففيتسيەنتىنە كوبەيتەدى. كوەففيتسيەنت 4,2-گە تەڭ. كەيىن شىققان سومادان 10 پايىز زەينەتاقى جارناسىن الىپ تاستايدى.