بالاباقشا – باقىت باسپالداعى

بالا تاربيەلەۋ – اۋىر دا, ۇزدىكسىز ءىس. تەحنولوگيالار دامىعان, جاھاندانۋ زامانىندا بالانىڭ بار ۋاقىتىن دۇرىس دۇنيەگە باعىتتاۋ ءۇشىن اتا-انا مەن ۇستاز ايانىپ قالماسى انىق. دەسە دە بالا تاربيەلەۋدىڭ سۋپەرپروگرەسسيۆتى جولى قانداي دەگەن سۇراق اتا-انالاردى ءجيى تولعاندىراتىنى راس.  قيالىن ۇشتاپ, ءبىلىمىن شىڭداپ, ويىن كەڭىتىپ, بويىن سەرگىتۋ ءۇشىن نە ىستەۋ كەرەك? ارينە, بالانىڭ قارىم-قابىلەتىنە قاراي بايقاۋلارعا قاتىستىرعان ءجون.

سوعان وراي قاراشا ايىنىڭ ون ەكىسىندە كوپكە ارمان بولعان حالىقارالىق «دامينوسيك» بالالار مەن جاسوسپىرىمدەر اراسىنداعى ونەر بايقاۋى ۇيىمداستىرىلدى. بايقاۋ 3-18 جاس ارالىعىنداعى بالالار مەن جاسوسپىرىمدەرگە ارنالدى. ءدۇبىرلى دوداعا 600-گە تارتا قاتىسۋشىلار قاتىستى. بۇل بايقاۋدىڭ وزگە بايقاۋلاردان ەرەكشەلىگى سول, تەك قازاقستاندىق بالالار عانا ەمەس, موڭعوليا, قىتاي ەلىنەن دە جۇيرىكتەر ات تەرلەتىپ كەلدى. كىل مىقتىلار حورەوگرافيا, ۆوكال, كوركەم ءسوز, اسپاپتا ويناۋ, بەينەلەۋ ونەرى, اكتەرلىك شەبەرلىك اتالىمدارى بويىنشا باق سىنادى. ىشىنەن وق بويى وزىق شىققان الماتى قالاسىندا ورنالاسقان «چۋدو دەتكي» بالا-باقشاسىنىڭ تۇلەكتەرى ەدى. اتاپ ايتساق, 1-ورىن كوركەمسوز اتالىمى بويىنشا باۋىرجانقىزى سارا جانە مۇراتحان راياناعا بۇيىرسا, اكتەرلىك شەبەرلىك اتالىمى بويىنشا گران-ءپريدى امانتاي باتىرحان, حۋساين نۇريسلام, سەيفۋللا يبراحيم, ەرمەك لەيسان, قۇسانعازى ايانات, تاليپباي ماليكا ەسىمدى بالدىرعاندار قانجىعاسىنا بايلادى. وسى ورايدا بالالاردىڭ ونەر-ءبىلىمىن عانا ەمەس, ادامگەرشىلىك ىزگى قاسيەتتەرىن دامىتقان, بايقاۋدا جۇلدەگەر اتانۋىنا, شىعارمالىق شىڭدالۋىنا ۇلكەن ۇلەسىن قوسقان جەتەكشىلەرى «چۋدو دەتكي» بالاباقشاسىنىڭ ادىسكى جانار ساتتىبەكقىزىنىڭ ورنى ەرەكشە.

قىسقاسىن ايتساق, بالانىڭ ويلاۋى ويناۋ ارقىلى قالىپتاساتىنىن ءاۋ باستان بىلگەن بابالارىمىز, بوبەگىنىڭ بولاشاعىن قالاي ويناعانىنا قاراپ بولجاعان. ۇيدەگى اتا-انا تىرشىلىك قامىمەن كەتكەندە, تالشىبىقتاي ۇل-قىزداردى تاربيە­لەي­تىن تاربيە مەكتەبى – بالاباقشا. ال وسى بايقاۋدا دارا شاپقان بالاپانداردىڭ باعىنا بىتكەن «چۋدو دەتكي» بالاباقشاسى ەلىمىزدىڭ تۇتقاسى بولار ەرەن ازاماتتاردى تاربيەلەپ جاتقانىنىنا سەنىمىمىز مول.

اقگۇل ايداربەكقىزى