بالالارعا تۋبەركۋلەزگە قارسى ۆاكتسينا ەگۋ توقتاتىلدى – «سق – فارماتسيا»

ەلىمىزدە بالالاردى تۋبەركۋلەزگە قارسى ەگۋ جۇمىستارى 2-3 ايعا كەشىگۋى مۇمكىن, دەپ حابارلايدى قازاقپارات ءتىلشىسى. بۇل تۋرالى ورتالىق كوممۋنيكاتسيالار قىزمەتىندە وتكەن بريفينگتە «سق-فارماتسيا» جشس باسقارما توراعاسىنىڭ مىندەتىن اتقارۋشى بەرىك ءشارىپ مالىم ەتتى. «قازاقستاندا جىل سايىن تۋبەركۋلەزگە قارسى 370 مىڭنان استام جاڭا تۋعان نارەستە مەن 230 مىڭنان استام 6-7 جاستاعى بالا ەگىلەدى. وتكەن كەزەڭدە بارلىعى 700 مىڭ بالا ەگىلگەن بولاتىن. سوڭعى 14 جىلدا جاپونيالىق Japan BCG Laboratory كومپانياسىنىڭ ەكپەسى قولدانىلىپ كەلگەن.  اتالمىش كومپانيا بيىلعى جىبەرگەن ەكپەنىڭ 33 سەرياسىن 35 ەلدەن قايتارىپ الۋىنا بايلانىستى قازاقستاندا تۋبەركۋلەزگە قارسى  ەكپە جۇمىستارى ۋاقىتشا توقتاتىلادى» دەگەن بەرىك ءشارىپ ونىڭ جاپونيالىق ەكپە ورنىنا ءۇندىستاننان Serum اتتى ەكپە اكەلۋ بويىنشا كەلىسسوز ءجۇرىپ جاتقانىن جەتكىزدى. «قازىر قر دەنساۋلىق ساقتاۋ مينيسترلىگىنىڭ ءتيىستى كەلىسسوزدەر جۇرگىزىپ جاتىر. ونى ءۇندىستاننان قازاقستانعا جەتكىزگەنشە 2-3 اي ۋاقىت كەتەدى. وسى كەزەڭگە دەيىن تۋبەركۋلەزگە قارسى ەكپە جۇمىستارى توقتاتىلا تۇرادى»,  – دەدى ول. قر تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ كوميتەتىنىڭ ءتورايىمى ليۋدميلا بيۋرابەكوۆا بۇعان دەيىن جاپونيالىق ەكپەنى سالدىرعان بالالار ءۇشىن الاڭداۋعا ەش نەگىز جوق ەكەنىن قوستى. «جاپونيالىق كومپانيا بيىل شىعارعان 90 مىڭ پارتيانىڭ 3 قۇتىسىنان عانا بوگدە زات تاپقان. ونىڭ وزىندە ەكپەنىڭ وزىنەن ەمەس, ەرىتكىشتەن تىعىننىڭ بولشەگى شىققان. جاپونيا سول سەبەپتى بۇكىل پارتيانى قايتارىپ الىپ جاتىر. سوندىقتان بۇعان دەيىن ەگىلگەن ۆاكتسينالاردىڭ بالا دەنساۋلىعىنا قاۋىپ ءتوندىرۋى مۇمكىن ەمەس», – دەدى كوميتەت باسشىسى.

دەرەككوز: https://24.kz