«بالالارىمىز ارقاشان ءبىلىمدى بولسىن». توقاەۆ قوسشى قالاسىنداعى مەكتەپ-گيمنازياعا باردى

فوتو: اقوردا

پرەزيدەنت قاسىم-جومارت توقاەۆتىڭ اقمولا وڭىرىنە جۇمىس ساپارى قوسشى قالاسىنداعى 1500 ورىندىق مەكتەپ-گيمنازيانى ارالاپ كورۋدەن باستالدى, دەپ حابارلايدى qandastar.kz Skifnews.kz اقپارات پورتالىنا سىلتەمە جاساپ.

قوسشى قالاسىنىڭ جاڭا اۋدانىندا ورنالاسقان مەكتەپ «بولات وتەمۇراتوۆ قورىنىڭ» جەكە ينۆەستيتسياسى ەسەبىنەن سالىنىپ, جەرگىلىكتى ءبىلىم ءبولىمىنىڭ باسقارۋىنا بەرىلگەن.

«جايلى مەكتەپ» ۇلتتىق جوباسىنىڭ ستاندارتتارىنا ساي بوي كوتەرگەن ءبىلىم وشاعىندا قازىرگى كەزدە ەكى اۋىسىممەن 2700 بالا وقيدى. مەكتەپتە 280 ورىندىق اكت زالى, 360 ورىندىق اسحانا, 2 سپورت زالى, ينفورماتيكا, حيميا, فيزيكا, بيولوگيا, تەحنولوگيا جانە مۋزىكا كابينەتتەرى بار.

مەكتەپ ديرەكتورى ديدار اسقاروۆانىڭ ايتۋىنشا, وقۋشىلار تەك ءبىلىم الىپ قانا قويماي, «ءبىرتۇتاس تاربيە باعدارلاماسى» اياسىندا سپورت سەكتسيالارىنا جانە شاحمات, توعىزقۇمالاق, اسىق اتۋ, بي, حور, فورتەپيانو, دومبىرا سەكىلدى ۇيىرمەلەرگە تەگىن قاتىسا الادى.

مەملەكەت باسشىسى روبوتتى تەحنيكا, موبيلوگرافيا, اۆتوموبيل جۇرگىزۋدى ۆيرتۋالدى ۇيرەنۋ, شەت ءتىلى كابينەتتەرىن, مەكتەپ كىتاپحاناسىن ارالاپ كورىپ, ۇستازدارمەن جانە وقۋشىلارمەن اڭگىمەلەستى.

– قازاقستاننىڭ وزىق مەملەكەتكە اينالعانىن قالاساق, وسىنداي روبوتتى تەحنيكا سياقتى باعىتتاردى ۇيرەنۋ كەرەك. بۇل – وتە قاجەت. بالالارىمىز ارقاشان ءبىلىمدى بولسىن, – دەدى قاسىم-جومارت توقاەۆ.

پرەزيدەنت ۇجىمعا ساتتىلىك تىلەپ, مەكتەپكە ءوزىنىڭ «اكە تۋرالى وي-تولعاۋ» كىتابىن جانە قازاقستاندا شىعارىلعان اۆتوبۋس سىيعا تارتتى.