«بالامىزعا تەگىڭدى بەر دەدىم»: ماڭعىستاۋ وبلىسىنىڭ اكىمى ەكس-دەپۋتاتتىڭ ارتىنا ادام سالىپ, قورقىتىپ ءجۇر

ماڭعىستاۋ وبلىسىنىڭ ەكس-دەپۋتاتى ىنتاش ناۋرىزوۆا وبلىس اكىمى نۇرداۋلەت قيلىبايدىڭ ىزىنە ادام سالىپ, قورقىتىپ جاتقانىن ايتتى. سەبەبى ول بۇعان دەيىن ۇلىنىڭ اكەسى وبلىس باسشىسى ەكەنىن اشىق جەتكىزگەن, دەپ حابارلايدى Skifnews.kz اقپارات پورتالى.

بۇرىنعى دەپۋتات ىنتاش ناۋرىزوۆا وبلىس اكىمى سوڭىنا ادام سالعانىن ايتىپ, پرەزيدەنت توقاەۆتان كومەك سۇرادى.

“قازىر 2022 جىلى دۇنيەگە كەلگەن ۇلىم بار. ۇلىمنىڭ اكەسى ماڭعىستاۋ وبلىسىنىڭ اكىمى نۇرداۋلەت قيلىباي. جىلدار بويى قيىندىق كورىپ, ەشكىمگە ايتپاي جۇرگەن ەدىم. سەبەبى بالامنىڭ اكەسىنە قاتتى سەندىم. الايدا قازىر اكىم مەنى قورقىتىپ, ءتۇرلى ارەكەت جاساپ جاتىر. ءبىر جىلداي ۋاقىت بولدى شىداپ جۇرگەنىمە. بالامنىڭ تەگى بولسىن, ارالاسىپ تۇر, ۋادەڭدى ورىندا دەگەنىم ءۇشىن مەنى قورقىتىپ, ارتىمنان ادامدار جىبەرەدى. مەنى تىنىشتىعىمنان ايىردى”, – دەدى ول.

ناۋرىزوۆا ونىڭ سوڭىنان مەملەكەتتىك قىزمەتكەرلەر, بەلگىسىز بىرەۋلەر مەن قاراقشىلار اڭدىپ جۇرەتىنىن ايتتى. ول اكىمنىڭ كەسىرىنەن بارلىق ەسىك جابىلىپ, سوڭىنان ءتۇرلى وسەك تاراپ جاتقانىن ايتتى.

“مەنى نەكەسىز, تەكسىز بالا دۇنيەگە اكەلدىڭ دەپ قارالپ جاتىر. ايتقان وسەكتەرى مەن قىسىمى دا از ەمەس. سونداي-اق جەلىدە مەنىڭ اتىمنان ارنايى تاپسىرىسپەن بالاعات جازبالار مەن پىكىرلەر جازىلىپ جاتىر. 2024 جىلى قۇقىق قورعاۋ ورگاندارىنا شاعىم ءتۇسىردىم. الايدا ارىزىم قارالماي, جابىلىپ قالدى. قازىر شاراسىز كۇيدەمىن”, – دەپ جازدى ول.