جاڭالىقتار
بالقاشتا قۇبىر اۋىستىرۋ كەزىندە ءۇش ادامنىڭ سۇيەگى تابىلعان
فوتو: اشىق دەرەككوز
بالقاشتا جىلۋ ماگيسترالدىق قۇبىر اۋىستىرۋ كەزىندە ءۇش ادامنىڭ سۇيەگى تابىلدى, دەپ حابارلايدى Qandastar.kz.
سۇيەكتەردى جۇمىسشىلار ءالىمجانوۆا مەن كالمىكوۆ كوشەلەرىنىڭ قيىلىسىنداعى جىلۋ تراسساسىن جوندەۋ كەزىندە تاپقان. ولاردىڭ ايتۋىنشا, مايىتتەر قۇبىرلارمەن قورشالعان.
بۇل تۋرالى ولار پوليتسياعا حابارلاعان. اتالعان دەرەك بويىنشا تەرگەۋ ءجۇرىپ جاتىر.
قاراعاندى وبلىسى پوليتسيا دەپارتامەنتىنىڭ ءباسپاسوز قىزمەتى ادام سۇيەگى تابىلعانىن راستادى.
– ءىس پوليتسياعا تىركەلدى, ونىڭ قورىتىندىسى بويىنشا پروتسەسسۋالدىق شەشىم قابىلدانادى, – دەلىنگەن حابارلامادا.
بالقاش قالالىق ءىىب باستىعى ايتكەن كادريننىڭ مالىمدەۋىنشە, قىلمىستىق ءىس قوزعالىپ, ساراپتاما تاعايىندالعان.
ماماندار قاڭقالاردىڭ جەر استىندا قانشا ۋاقىت جاتقانىن جانە ءولىمنىڭ زورلىق-زومبىلىق بولعان, نە بولماعانىن انىقتايدى. پوليتسيا ولگەندەردىڭ جەكە باسىن انىقتاۋعا كىرىستى.
ساراپشىلاردىڭ ايتۋىنشا, مايىتتەردىڭ جاتقانىنا بىرنەشە جىل بولعان.
