باپي: ارميا مۇگەدەك ەتۋگە مۇددەلى ەمەس

فوتو: اشىق دەرەككوز

سارباز ەربايان مۇحتاردىڭ تراگەدياسىنان سوڭ قوعامدا «بالانى اسكەرگە جىبەرۋدىڭ قاجەتى جوق» دەگەن پىكىر قاپتاپ وتىر. ءماجىلىس دەپۋتاتى ەرمۇرات ءباپي وسىعان الاڭ, – دەپ حابارلايدى qandastar.kz.

«بىزدە اسكەردەگى وسىنداي جەكەلەگەن كەلەڭسىز جايتتەردى جەبەۋ ەتىپ, قوعام مەن ارميانىڭ اراسىنا جىك سالۋ تەندەنتسياسى ەتەك الۋدا. اسكەردى قۇبىجىق رەتىندە كورسەتۋ ءۇردىسىن ماسس-مەديا وكىلدەرى دە ۇرلەي تۇسۋدە.

رەسەيدىڭ ۋكرايناداعى اگرەسسيالىق سوعىسى تۇرعىسىنان قارايتىن بولساق, قازاقستانداعى اسكەر مەن قوعامنىڭ اراسىنا وسىلايشا سىنا قاعۋ وتە قاۋىپتى قۇبىلىس بولماق. اسكەري ورتا سۋبكونتينەنتتىك ۆاكۋمداعى قۇرىلىم ەمەس, ول قوعامنىڭ وزىنەن شىققان, حالىق دايىنداپ بەرگەن الەۋمەتتىك ءبىر توپ. قوعام رۋحاني تۇرعىدا قانداي دىمكاس بولسا, اسكەرىمىز دە سول سىرقات قوعامنان الىسقا كەتۋى مۇمكىن ەمەس.

سوندىقتان  ەلدىڭ ەرتەڭگى قاۋىپسىزدىگىن قورعايتىن اسكەردى وتباسىنان باستاپ قالىپتاستىرۋىمىز كەرەك. «وتان –  وتباسىنان باستالادى». ال وتاندى قورعاۋ – بۇل وتباسىن قورعاۋ دەگەن ءسوز», – دەيدى ول.

ايتا كەتەيىك, سوڭعى 3 جىلدا 270 اسكەري قىزمەتشى قايتىس بولعان. اسكەري پروكۋرورلار ونىڭ باستى سەبەبىن اۋرۋ, جول-كولىك وقيعاسى جانە وزىنە قول جۇمساۋ سالدارىمەن تۇسىندىرەدى. سارباز ەربايان مۇحتاردى دا اجەتحانادا قۇلاپ, باسىمەن تاقتايشاعا سوعىلعان دەپ مالىمدەيدى ۇلتتىق ۇلاننىڭ اسكەري ءبولىمى.